Красноярск край эмнелгезиниң өртең салбырынга чыткан ийи кижини үндүр бижээш, Тываже санитарлыг авиация-биле үдээн

Марттың 7-ден тура Красноярск крайның эмнелгезинге чыткан ийи аарыг кижини үндүр бижээн. Олар ам Тывада чедип келгенин республиканың Кадык камгалал яамызының парлалга албаны дыңнаткан.

Кезиишкин эртер бир аарыг кижи крайның эмнелгезинде арткан. Ооң байдалы чүгээр, ындыг болзажок өрттенген ханы балыгларны ам-даа эмнээр.

Марттың 6-да Шагаан-Арыгның ЧЭТ-ке озал-ондактан 15 кижи республиканың 1 дугаар эмнелгезинче кирген. Өртеңнери аар, бажында болгаш өске-даа черлеринде кемдээшкиннерлиг 8 кижини Красноярск крайның клиниказынче чоруткан.

Алды кижиниң байдалы экижип кээрге үндүр бижээн, амдыызында бир кижи  эмнелгеде арткан. Кадыкшыл байдалы дүрген экижип турарын эмчилер демдеглээн. А бир кижиниң мөчээни, улуг каража болган.

Кадык камгалалының сайыды Анатолий Югай республиканың чурттакчыларга дузазын чедирген Красноярск эмчилеринге четтиргенин илереткен.

«Бистиң республиканың чурттакчыларын эмнелгелерге чыттырып, бедик деңнелдиг эмчи дузазын көргүскениниң бо чаңгыс эвес чижээ-дир. Ажылдар ниити медицинаның ниити информастыг системазы-биле чоруп турар» — деп, сайыт демдеглээн.