Тыва Шагаан-Арыгга чаа котельная тудар төлевилел-санаашкын саавырларын кылып эгелээн

Бо чылдың мартта Шагаан-Арыгның тус чер чылыдылга төвүнге частыышкындан үрелген котельнаяның орнунга чаа тудугну тудар. Тываның Баштыңы Владислав Ховалыг эрге-чагырганың ол талазы-биле шиитпирин дыңнаткан. Техниктиг даалга белен, специалистер чаа котельнаяның төлевилел-санаашкын саавырларын ажылдап кылырынче кирген.

Шакта-ла 50 гигакалорий күчүде санаттынган келир үениң объектизин хоорайның бурунгаар хөгжүлдезин көрүп кылыр. Шагаан-Арыгның чылыг-хандырылга системазынга чылыг чидириин болдурбазы-биле, ону өйлээр чүүлдү техниктиг ажылдарже киирген.

Объектини амгы технологияларның ачызында кыска үеде тудуп үндүрер: төлевилел-санаашкын документилерин алды ай иштинде кылыптарга, тудугнуң бодун бир чыл хире тудар.

«Амгы үеде одалга сезонунга белеткел ажылдары Шагаан-Арыгның эрги ЧЭТ-те эгелээн. ЧЭТ дараазында кышка бүзүрелдиг болзун дээш, бүгү дериг-херекселдерни үндезини-биле септеп, шыңгыы контрольга алыр» - деп, регионнуң удуртукчузу демдеглээн.

Бөгүн Шагаан-Арыгда херек үеде кончуг дүрген ажылдадыптар сес көжүп чоруур котельнаялар барын сагындыраал.

Төлевилел-санаашкын сааварларының ажылдарын республика акша-хөреңгизи-биле кылыр: регионнуң казназындан 50 млн рубльди ол сорулгаже үндүрген. Баш бурунгаар санаашкыннардан алырга, котельная тудуунга бир миллиард хире рубль херек. Регионалдыг чазак РФ-тиң Тудуг яамызының шугуму-биле федералдыг деткимчеже кордап турар. Амгы үеде республиканың чаа котельная тудуунуң талазы-биле саналы сайгарылгада.