Тывада Ростех заводу чазылдырар чүүлдер бүдүрүлгезин эгелээн

2023 чылдың ноябрьда Кызыл кожууннуң девискээринде ажыттынган «Техмашсервис» АН-ның эмульсиялыг частыр бүдүмелдер заводунга үндүргени чүүлдерни «Тардан Голд» компания ажылында ажыглап эгелээн. Алдын тывыш организациязының удуртукчузунуң чалааны-биле, экономиктиг сайзырал болгаш үлетпүр сайыды Айдыс Сат чазылдырыышкын ажылдарын көрген.

- Республика девискээринге бүдүрген продукцияны компаниялар боттарның ажылдарында ажыглап эгелээн эки болду. Ынчалдар удур-дедир харылзаалыг кады ажылдажылга эгелээн – деп, Сат тайылбырлаан.

Тываның Чазааның техниктиг деткимчези-биле «Техмашсервис» компания эмульсиялыг частыр чүүлдер бүдүрер төлевилелди боттандырып эгелээнин сагындыраал. Республиканың Баштыңы Владислав Ховалыг база «Техмашсервис» АН-ның инвестиция угланыышкыннарын сайзырадыр дирекцияның директору Павел Аброськин бүдүрүлгениң ажыдыышкынга киришкенин сагындыраал.

2023 чылдың мартта Красноярскиниң экономиктиг шуулганының шөлүнге регионнуң чазаа биле «Техмашсервис» АН даг ажылдарынга ажыглаар чазылдырар чүүлдер бүдүрүлгезин ажыдар дугайында дугуржулганы чарган. Төлевилелдиң ниити үнези 400 ажыг млн рубль болган.

Экономиктиг сайзырал яамызының дыңнатканы болза, чыл эгезинден бээр 20 тонна продукцияны бүдүрген. Бөгүнде база бир организация - «Тардан Голд» КХН кырыкы чазылдырыышкын ажылдарынга херек бүдүмелге чагыгны алган. «Лунсин» КХН компонентилерни чагып, кады ажылдаар дугуржулганы кылган, а «Голевтиң даг-руда компаниязы» КХН (чес-порфир рудазы), «Кара-Белдир» КХН (алдын) база «Тываның даг-руда компаниязы» КХН (хөмүр) кады ажылдажылгага сонуургалдыын бадыткаан бижикти чоруткан.

Бир эвес бүдүрүлге долу күчүзү-биле ажылдап эгелээр болза, бюджеттиң шупту деңнелдеринче 87,2 млн рубль үндүрүг төлевирлерин болгаш чыылдаларын киирер шыдалдыг.