Тываның ИПСЭР программазының ийиги чадазын ажылдап доозар

Президент Владимир Путин 10 российжи регионнарның, ооң иштинде Тываның база, социал-экономиктиг хөгжүлдезиниң бот-тускай программазын октябрьның 1-ге чедир бадылаар даалганы берген.

Регионнуң чазаа 2030 чылга чедир боттандырар программаның ийиги чадазының хемчеглерин ажылдап эгелээнин, республика баштыңы Владислав Ховалыг дыңнаткан. 2030 чылга чедир күрүне программазы-биле Тыва ам-даа 6 млрд рубльди алыр.

«Регион хөгжүлдезинге хамааржыр санал-оналдарны баш бурунгаар Россияның экономиктиг сайзырал яамызынче киирген. Президентиге хуралдаан соонда, бистиң кураторувус, экономиктиг сайзырал сайыды Максим Геннадьевич Решетников Тывага келгеш, объектилерни эргип кезээн. Курлавырлар шын ажыглаттынып, ажыл-херектер бүдүрүлгелерже шилчип, кижилер төлептиг акша-шалыңны ап эгелээнин, ниитизи-биле республика чурттакчыларының амыдырал-чуртталгазының байдалы бедээнин ол демдеглээн» - деп, Тываның Баштыңы айыткан.

Тываның социал-экономиктиг хөгжүлдезиниң бот-тускай программазын 2020 чылдан боттандырып эгелээнин сагындыраал. Күрүне программазын күүседип эгелээнден 800 хире ажылчын олуттарны тургузуп, бюджеттен дашкаар 17,4 млрд рубль акша инвестициязын хаара туткан. Программа боттаныышкынының ачызында республикада чуртталга база инженерлиг инфраструктура объектилерниң тудуу болгаш чурттакчы чоннуң орулгазы көвүдээн, ядыы-түреңги чоруктуң деңнели кызырылган.

Күрүне программалары-биле республиканың Чаа-Хөл база Таңды кожууннарда дээрбе бүдүрүлгелерин, 3 муң хире тонна тараа шыгжаар черлерни туткан, Улуг-Хем кожууннуң Арыг-Үзүү суурда кырлыг-кара болгаш тараа культураларының үрезиннерин арыглаар цехти ажылдаткан, колбаса кылыглары болгаш эъттен амданныг чемнер бүдүрер «Белдир» көдээ ажыл-агый бүдүрүлге кооперативин Сукпак суурда ажыткан.

Удавас бажың эт-севи бүдүрер фабрика ажыттынар, тууйбу болгаш демир-бетон кылыглар бүдүрүлгезин эде чаартыр, ийиги чиг эттен резин плитка база брусчатка бүдүрүлгезин шуудаткан.
Улуг эде тудуушкун ажылдарының соонда, "Чедер" санаторлуг-курорт комплекизи ажыттынарынга белеткенип турар.