Тываның 9 муң ажыг доозукчуларында күрүне шылгалдалары эгелээн

Бөгүн Тываның 9-ку база 11-ги класстарның доозукчуларында шылгалдалар эгелээн. Майның 21-де база 22-де тоску классчылар даштыкы дылга шылгалданы тудар. А бөгүн оолдар, уруглар төрээн дылда ОГЭ-ни база төрээн чогаалда ЕГЭ-ни дужааган. Ам майның 23-те 11 класстың доозукчулары география, литература база химияга чаңгыс аай күрүне шылгалдаларын дужаар.

Дараазында хүннерде шылгалдаларны планнаан:
Майның 28 (вторник) – орус дыл;
Майның 31 (пятница) - математика (баазалыг база профильдиг деңнел);
Июньнуң 4 (вторник) – ниитилел билиглери, физика;
Июньнуң 7 база 8 (пятница биле суббота) - информатика болгаш ИКТ, даштыкы дыл (аас-биле);
Июньнуң 11 (понедельник) - биология, төөгү, даштыкы дыл (бижимел кезээ).
Июньнуң 14 - төрээн (тыва) чогаал.

Бо чылын доозукчулар ортузунда ОГЭ-ге беш эртем эң нептереңгей болган – 9071 кижи информатика, ниитилел билиглери, география, биология, химияны шилип алганнар.

Эрткен чылдарга деңнээрге физикага ОГЭ киржикчилери көвүдээнин өөредилге сайыды Елена Хардикова демдеглээн. Оон аңгыда, ниитилел билиглери, география, химия база англи дыл шилип алганнарның саны хөй хевээр.

«11 класстың доозукчуларында ниитилел билиглеринге, математика (профильдиг), биология, химияга сонуургал улуг. Төөгү, физика, англи дыл, география база информатика шилип алган доозукчуларның үлүү эрткен чылда ышкаш» - деп, Хардикова немээн.

Бүгү республикада 33 шылгалда пунктуларынга экзаменнерниң кол хүннери эртер. Шылгалда чорудуун харыылап турар өөредилге черлериниң удуртукчулары школачыларга психологтуг деткимчени көргүзер. «Сайзырал» республика төвүнүң психологтары херек апарза, доозукчуларга чогуур дузаны көргүзеринге белен.