Тываның Баштыңы Владислав Ховалыг Россияның Маадыры Сергей Шойгунуң төрүттүнген хүнү-биле байырын чедирген

Бөгүн, майның 21-де, Россияның Маадыры, Россия Федерациязының Айыыл чок чорук чөвүлелиниң секретары Сергей Шойгу 69 харлап турар.

- "Тываның чурттакчылары, Силерниң чаңгыс чер-чурттугларыңар, шылгараңгай чедиишкиниңер дээш Силерге кезээде чоргаарланып чоруур. Силер бистиң Төрээн чуртувустуң хөгжүлдезинге болгаш быжыглалынга улуг үлүг-хууңарны киирип, төрээн республикаңарны деткип чоруур силер –деп, Тываның Баштыңы Владислав Ховалыг социал четкилерде бодунуң арынында бижээн.

Чурттуң комплекстиг айыыл чок чоруунда чугула албан-дужаал болур Россия Федерациязының Айыыл чок чоруук Чөвүлелиниң Секретарының албан-дужаалынга чаа-чаа чедиишкиннерни сеткилимниң ханызындан күзедим. Владимир Владимирович Путинниң сурукчузу Силерниң ат-сывыңар күштүг Россияның, эрес-маадырлыг ат-алдарның демдээ болур деп, В. Ховалыг демдеглээн.

Сергей Кужугетович Шойгу Тыва АССР-ниң Чадаана хоорайга, район солунунуң редактору Кужугет Шойгу биле зоотехник Александра Шойгунуң өг-бүлезинге төрүттүнген. 1977 чылда Красноярскиниң политехниктиг институдун «Инженер-тудугжу» мергежилдиг дооскан. 11 чылдың дургузунда Тываның, Красноярск крайның база Хакасияның тудуг организацияларынга ажылдаан.

1991 чылда Шойгуну Россияның камгалакчылар корпузунуң баштыңы албан-дужаалга томуйлаан, каш ай эрткенде Россия Федерациязының хамааты камгалал, онза байдалдар болгаш онза байдалдарның уржуктарын чайладыр күрүне комитеди кылдыр эде тургускан. А 1994 чылда – ону яамы кылдыр калбарткан.

2012 чылда Москва облазының губернатору, ол-ла чылдың ноябрьда Россияның камгалал сайыды албан-дужаалче кирген. 2024 чылдың май 12-де чурттуң Президентизи Владимир Путин Сергей Шойгуну чурттуң айыыл чок чорук чөвүлелиниң секретарынга томуйлаан.