“Медээлер экономиказы” национал төлевилел-биле ыраккы Кунгуртуг, Кара-Хөл база Кызыл-Хая суурларже ВОХШ шөйер

«Медээлер экономиказы» чаа национал төлевилел-биле волокно-оптиктиг харылзаа шугумун тудар чурттуң ыраккы чедери берге чурттакчылыг пунктулар субъектилериниң даңзызынче республика киргенин Тываның Баштыңы Владислав Ховалыг дыңнаткан.

Президент Владимир Путин Федералдыг Хуралга бодунуң Айыткалында чаа национал төлевилелди айыткан.
- Ынчалдыр Кунгуртуг, Кара-Хөл база Кызыл-Хаяга чедир 400 км чыгыы чаа шугум тудуунга федералдыг акша-хөреңгиже кордап болур бис. Россияның Чурагай яамызының удуртукчузу Максут Игоревич Шадаев-биле кады ындыг шиитпирни үндүрдүвүс. Айтырыгны ажылдап кылыры амыр эвес болган. Чаа национал төлевилелде ооң үре-түңнели көстүп келгенинге өөрүп тур мен – деп, Владислав Ховалыг шиитпирниң дугайында дыңнаткан.

«Чурагай экономиказы» национал төлевилелдиң «Информация инфраструктуразы» регионалдыг төлевилел-биле Тываның 139 чурттакчылыг черлеринче муң ажыг километр оптоволокнолуг харылзаа шугумун шөйген.

Амгы үеде шупту 408 социал ужур-дузалыг объект, ооң санында 172 школа, 80 библиотека, 89 ФАП, 108 көдээ чагырга черлери база 8 өрт кезээ Интернет четкизинде коштунган. Республиканың 70 чурттакчылыг черлеринде бар четкилерни 2023 чаарткан соонда, мобильдиг интернеттиң дүргени 25 хуу улгадып, ону ажыглаары 30 хуу көвүдээн.

Амгы үеде, бир муң кижиден хөй чурттакчылыг суурлардан чедери берге база нарын чүгле Кунгуртуг, Кара-Хөл база Кызыл-Хая суурлар харылзааның волокно-оптиктик шугумунда коштунмаан.