Тывада тергиин өөредилгелиг студентилериниң төлевирлиг өөренген чарыгдалынга компенсацияның хемчээлин улгаттырган

Тываның эрге-чагыргазы төлевирлиг өөренип турар студентилерни республика бюджединден деткиириниң хемчээлинде элээн өскерлиишкиннерни кылган. Тываның Баштыңы Владислав Ховалыг чогуур шиитпирге атты салган.

Өөредилге төлевиринге чарыгдалдарны эгидериниң дугайында дүрүмче эдилгени киирген. Бирээде, ындыг чарыгдалдарның кезек-чамдыызынга республикадан компенсацияны ортумак профессионал өөредилге черлериниң – колледжтер, училищелер база техникумнар сургуулдары алыр. Ооң мурнунда ындыг дузаламчыны чүгле дээди өөредилге черлериниң студентилери ап турган.

База бир улуг өскерилге – компенсацияның бодунуң хемчээли өскен. Мооң мурнунда студент улдуңну чүгле бештерлиг хаарга, семестр өртээниң 50 хуузун төлеп берип турган. А бир эвес сессияны “тергиин” база “эки”, азы чүгле “эки” демдектерлиг дужааптарга, төлевирни 30 хууже бадырыптар турган. 2024 чылда компенсацияны тус-тузунда 70 база 50 хуу кылдыр доктааткан.

Өөредилге өртээ ортумаа-биле өскенин өөренип көргеш, компенсацияның хемчээлин улгаттырганын, Тываның Өөредилге яамызы тайылбырлаан. Амгы үеде дээди өөредилге черлеринде ооң түңү чылда 240 муң, колледжтерде – 56 муң рубль хире. Тыва өг-бүлелерниң көвей кезии хөй ажы-төлдүг болганындан, оларны боттары төлеп алыры дыка берге, харын-даа болдунмас бооп турар.

Бо төлевилел Тывада 2016 чылдан бээр күүсеттинип турар. Чижээ, 2023 чылда студентилерге компенсация кылдыр 320 хире муң рубльди шилчиткен. Регионалдыг бюджеттиң аргалары кызыгаарлыг болганындан, дуза алыкчыларының санын 10 кижи кылдыр кызыгаарлаан, оларның өөредилгезин көрүп, шилиир. Оон аңгыда, регионалдыг эрге-чагырга органнарының тускай шиитпири-биле бадылааны республикага херектиг мергежилдерде өөренип турар студентилер шилилдеге киржип болур.