Тывада Шагаан-Арыгга ЧЭТ-ке айыыл-халаптан киирген онза байдал чурумун соксаткан

Бо чылдың март 6-да Шагаан-Арыг хоорайның ЧЭТ-ке авариядан киирген регионалдыг онза байдал чурумун май 15-те соксаткан. Республиканың Баштыңы Владислав Ховалыг чогуур айтыышкынга атты салган.
“Тыва Республиканың девискээринде одалга сезону доозулганы-биле база регионалдыг хемчээлдиг “онза байдал” чурумун кииреринге үндезин болган байдалды чайлатканы-биле” онза байдал чурумун соксадыр дугайында шиитпир үнгенин документиде тайылбырлаан.

Шагаан-Арыг хоорайда “ЧЭК-4 БК” оран-савазының кадыг одаар чүүл бээр транспорт шугумунга көс кыпканындан, хөмүрнүң газтыг ыш холуксаазы чазылгаш, төпчүткен одалгалыг бажыңнарда чурттап турар 4000 ажыг кижиниң амыдырал-чуртталга байдалы нарыыдаанын сагындыраал.

Озал-ондак үезинде 23 кижи кемдээн. Марттың 7-де Россияның ОБЯ Ил-76 борту-биле берге байдалдыг сес кижини Красноярск крайның клиниктиг эмнелгезинче чедирген. Аарыг кижилерниң бирээзи реанимация салбырынга алган кемдээшкининден мөчээн. Бөгүн эмнелгениң өртең салбырында үш кижи арткан, оларның бирээзи планныг кезиишкинни эрткен.

Федералдыг яамылар болгаш ведомстволардан, Россияның регионнарындан специалистер Тывада озал-ондактыг уржуун чайладырынга дузалашкан. 435 санныг чылыдар дериг-херекселдерни, ооң санында 13 модульдуг котельнаяларны республикага эккеп, салган.

Улуг деткимчениң болгаш билдилиг хөделиишкиннерниң ачызында, объектиниң чылыг дамчыдар ажылын шалыпкын катап кылгаш, хоорайның төпчүткен чылыг четкизинге доңуушкунну болдурбаан.

Бөгүнде котельнаяның оран-савазында септелге ажылдары уламчылавышаан. Майның 15-те Шагаан-Арыг хоорайда одалга сезону доозулган.