Республикада 2023-2024 чылдың одалга сезону доозулган

14.05.2024 Тываның Баштыңы Владислав Ховалыг бодунуң социал четкизи таварыштыр, республиканың одалга-энергетика комплекизиниң объектилеринде 2023-2024 чылдарның одалга сезону доозулганының дугайында дыңнаткан.

Республиканың удуртукчузу коммуналдыг котельнаяларлыг чурттакчылыг черлерже төпчүткен чылыгны бээрин соксадыр хуусааны айыткан:
- Чаа-Хөл суурнуң социал объектилеринче база чуртталга бажыңнарынче чылыг бериишкини майның 13-те;
- Кызыл, Шагаан-Арыг база Ак-Довурак хоорайларда чылыг хандырылгазы майның 15-те;
- Хову-Аксы суурга одалга сезону майның 20-де доостур.

Владислав Ховалыг 2024-2025 чылдың дараазында одалга сезонунга белеткелче тускай угланыышкынныг бүдүрүлгелер-биле кады ажылдап кирер даалганы Тываның Одалга болгаш энергетика яамызынга онааган.

Регион Баштыңының даалгазы езугаар, одалга сезону доозулган соонда, ийи неделя дургузунда, изиг суг хандырылгазын өжүрүп, планнаашкынныг гидравлика шенелделерин чорудар.

Тываның эң улуг чылыдылга-энергетика комплекизи – Кызылдың чылыг-энергетика төвүнүң дыңнатканы болза, ажылчыннар чылыг четкизинде изиг суг хандырылгазы турда, чылыг хандырылгазының системазын эде солуур ажылдарны чорудар. Хөй аалдыг бажыңнарның чылыдылга пунктуларын эде солууру дээш харыысалга башкарыкчы организацияларда деп, бүдүрүлге сагындырган.