Бүгү-российжи Куда-дой фестивалында Тывадан аныяктар салым-чолун доңнаштырган

Дүүн, майның 12-е, ВДНХ-да “Россия” делегей чергелиг делгелге шөлүнге тыва аныяктар Денис Сотпа биле Олча Ооржак шайлалгазын ойнааннар. Ол хүн, бүгү чурттан куда доюн эрттирер 150 эжеш ынакшааннарның аразындан Денис биле Олча Москага эрткен бүгү-российжи бирги шайлалга фестивалын ажытканнар.

Ынакшаан аныяктар кайызы-даа Тываның Чеди-Хөл кожууннуң культура шугумунда ажылдап чоруур. Ө-бүлениң эр ээзи «Танды-Уула» кожууннуң культура бажыңының удуртукчузу, а өөнүң ишти - кожууннуң культура эргелелиниң башкарыкчызы бухгалтери бооп ажылдап чоруур. Элээн чылдар болу берген өг-бүле ажы-төлдүг.

ВДНХ-ның кол эжииниң арказындан тура, «Россия» делгелгезиниң кол кудумчу сценазынга чедир ынакшааннар чыскаалынга аныяктар киржип, бүдүн чурттуң мурнунга, карактарынче көржүп алгаш, «ийе» дээн ыдык даңгыракты бээрлер. Чыскаалды цыган хөгжүм ансамбли, гармоньчулар, аниматорлар база цирк артистери үдээн. Нацонал идик-хептиг душтук оол биле кыс алтарьга чеде бээри – онзагай болуушкуннуң кол ылгавыр чүүлү ол. Ынча хөй аныяктарның куда доюн эрттирерип турары эң солун болгаш чараш болушкуун болганын делгелгени сонуургап келгеннер демдеглээн.

Өг-бүле чылын эгелээн байырлыг езулалда Президент Владимир Путинниң киржилгези-биле кывыскан “Россияның чүрээ” бүгү-российжи өг-бүле одааның одун аныяктарга дамчыткан. Байырлал кезээнде Полина Гагарина биле Ирина Дубцова хөгжүмнүг байырны чедирген.

Эртен, майның 14-те, шайлалга фестивалында бистиң ийи аныяктарывыс — Александр Агбаан биле Солангы Тамдын салым-хуузун доңнаштырып, өг-бүлени тургузар. Келир үеде өгнүг эр ээзи болур аныяк оол – хуу хлеб быжырар черни эргелекчилеп турар болза, а душтуу – курлавырлыг хандырылга компаниязында ажылдыг.

Фестиваль майның 19-ка чедир неделя ажыг үе иштинде уламчылаар. Шупту федералдыг округтар Москваже боттарының аныяктарын эккеп таныштырарын делгелгениң чиңгине директорунуң оралакчызы Анастасия Звягин демдеглээн. «Россия» делгелге шөлүнге аныяктарның шайлалгалары неделя дургузунда уламчылаар. Ол фестиваль үезинде 200 эжеш аныяктар боттарының салым-чолун доңнаштырар» — деп, Звягина дыңнаткан.