Тывада уруг-чаштың эргелериниң талазы-биле төлээге Саида Сеңгии томуйлаткан

Тыва Республиканың Дээди Хуралының (парламентизиниң) тоску сессиязының ээлчег чок дөрткү хуралынга Тываның Баштыңының саналы-биле Тыва Республикада уруг-чаштың эргелериниң талазы-биле төлээниң албан-дужаалынга Саида Хертековна Сеңгии бадылаттырган.

Тываның уруг-чаштың эргелериниң талазы-биле төлээзин томуйлаарының дугайында айтырыг хуралдың хүн айтырыының эң-не бажында. Ооң бетинде ук айтырыгны Россия Федерациязының Президентизиниң чанында Уруг-чаштың эргелериниң талазы-биле төлээ-биле Саида Сеңгииниң кандидатуразын сүмелешкен турган. Ооң кандидатуразы дээш 24 депутат бадылаан. Шиитпир хүлээп алырынга 17 бадылаашкын четчир турган. Уруглар омбудсмениниң албан-дужаалынга кордакчы беш чыл хуусаага соңгудар. Соңгуткан соон дарый Саида Сеңгии Тыва Республиканың Дээди Хуралының оран-савазынга даңгыракты орус, тыва дылдарга берген.

Саида Хертековнаның күш-ажылчы намдарының 20 ажыг чылы ИХЯ-ның системазында назы четпээннерниң херектериниң талазы-биле болгаш республиканың социал адырга албан-ажыл-биле холбашкан. 1993 чылда ол Кызылда күрүнениң педагогика институдун, 2007 чылда – Россияның ИХЯ-зының Сибирьде юридиктиг институдун дооскан. 1994 чылдан тура назы четпээннерниң херектериниң талазы-биле инспекторунга болгаш улуг инспекторунга, назы четпээннерниң херектериниң талазы-биле ажылды организастаар салбырның даргазынга, ТР-ниң ИХЯ-зында назы четпээннерниң херектериниң талазы-биле полицияның участок төлээлериниң болгаш салбырларның ажылын организастаар килдистиң начальнигинге ажылдаан. 2016 чылда Тываның Өг-бүле болгаш уруглар херектериниң талазы-биле агентилелди баштай берген. 2019 чылдың январьдан тура республиканың Күш-ажыл болгаш социал политика яамызын удуртуп турган.

2020 чылда ол Тыва Республиканың Чазааның оралакчызы даргазының албан-дужаалынга томуйлаткан, сөөлүнде Тыва Республиканың Баштыңының чөвүлекчизи албан-дужаалды элээп турган. 2022 чылдан бо үеге чедир Тыва Республиканың Чазааның чанында Назы четпээннерниң херектериниң база оларның эрге-ажыктарын камгалаар албан черлериниң комиссиязының ажыл-чорудулгазын хандырарының талазы-биле эргелелди удуртуп турган.

«Күш-ажылчы шылгарал дээш» деп медаль-биле шаңнаткан.