Тываның Баштыңы Владимир Путинге Президент соңгулдаларынга тиилээни дээш байырын чедирген

Россияның Төп соңгулда комиссиязы Президент соңгулдаларның түңнелдерин албан езузу-биле чарлаан. Соңгулдаларга 87576075 соңгукчу киришкен, келиишкин 77,49 хуу болган. Владимир Путин эң хөй үннү алган: 76 277 708 кижи соңгаан, азы соңгаан кижилерниң 87,29 хуузу. Тываның Баштыңы Владислав Ховалыг Тываның чону Президентиниң курузун бир дем-биле деткип, ол дээш 95,37 хуу үннү бергенин демдеглээш, республиканың өмүнээзинден Владимир Путинге байырны чедирген.

- Владимир Владимирович бистиң национал лидеривис дээрзин шынзыдып, бүгү делегейге бадыткап, соңгулдаларда көргүстү. Хамаарышпас, бот-догуннаан болгаш күштүг Россия дээш хөй националдыг Тыва чаңгыс үн-биле шиитпирлиг бадылаан! Бистиң чуртувустуң чаңгыс демниин кадагалап, бодунуң амыдырал тургузуун, бодунуң үнелиг чүүлдерин, бодунуң делегейин эп-найырал-биле ам-даа камгалаарынга бүзүрээр мен – деп, Владислав Ховалыг бодунуң блогунда бижээн.

Тываның чамдык суурларының чурттакчылары Владимир Путинни чүс хуу деткээнин республиканың удуртукчузу демдеглээн. Оларга Чөөн-Хемчик кожууннуң Чыраа-Бажы, Каа-Хем кожууннуң Кундустуг, Бии-Хем кожууннуң Хүт, Улуг-Хем кожууннуң Иштии-Хем, Сүт-Хөл кожууннуң Ак-Даш суурлар хамааржыр.

Дүүн эткен тускай хуралга, Россияның Төп соңгулда комиссиязының даргазы Элла Памфилова Президент соңгулдаларында бадылаашкынның албан езунуң түңнелдерин чарлаан. Соңгулдага киришкен дөрт кордакчыдан Владимир Путин соңгукчуларның 87,28 хуу (76 277 708 кижи), Николай Харитонов – 4,31 хуу (3 768 470), Владислав Даванков – 3,85 хуу (3 362 484) база Леонид Слуцкий — 3,20 хуу үннерин (2 797 629) алган.

Даштыкыда чурттап турар 388 791 соңгукчу президент соңгулдаларында бадылаан.

Комиссияже чурум үрээшкиннериниң дугайында чаңгыс-даа хомудал кирбээнин ТСК-ниң баштыңы демдеглээн. Соңгулда түңнелинде, 14 муң хире дыңнадыг кирген. Олар шупту даштыкыдан келген. 459 дыңнадыгны хынап турар.

Россия девискээринге бадылаашкын үезинде бюллетеньнерни хөйү-биле үрегдээн 41 болуушкун демдеглеттинген.

Россияга Прездент соңгулдалары марттың 15-17 хүннеринде болуп эрткен.