Чаагайжыдар объектилер дээш бүгү-российжи бадылаашкында Тывадан 86 төлевилел киржип турар

Бүгү чуртта болгаш Тывада база, марттың 18-тен эгелеп, «Чуртталга оран-савазы болгаш хоорай хүрээлели» национал төлевилелдиң “Таарымчалыг хоорай хүрээлелин хевирлээри” федералдыг төлевилел-биле девискээрлер чаагайжыдылгазынга онлайн-бадылаашкын чоруп турар.

Кожууннарда аңгы-аңгы хөй-ниити черлерин чагайжыдар 86 төлевилел республикадан бүгү-российжи конкурста киржип турар. Регионнуң Баштыңы Владислав Ховалыг бадылаашкынга идепкейлиг киржип, Кызыл хооорайга тудар тускай шериг операциязының киржикчилеринге скульптурлуг комплекс төлевилелин деткииринче чаңгыс чер чурттугларын кыйгырган.

Хөй-ниити черлеринде ажылдап турар волонтерлар дузазы-биле https://17.gorodsreda.ru онлайн-платформаже киргеш, төлевилелдер-биле таныжып, таарышканы объект дээш бодунуң үнүн бээр. Бадылаашкынга 14 хар четкен элээдилер база киржип болур. Бир кижи 2025 чылда чаагайжыдар бир төлевилел дээш үнүн кадар.

Кызыл хоорайдан бадылаашкында киржип турар төлевилелдерниң бирээзинге – тускай шериг операциязының киржикчилеринге тураскааткан скульптурлуг комплекс хамааржыр. ТШО хоочуннарының ассоциациязының Тывада регионалдыг салбыры төлевилелди идип үндүрген.

Төлевилелде көрдүнгени-биле комплексти Советтиг Тываның 5 чылы аттыг стадионнуң чоогунда Улуг-Хемниң эрик чоогунга тудар. ТШО дайынчызынга тураскаал, Россия болгаш Тываның туктары-биле чергелештир дээрже өрү ушкан дуруяаларның үш одуруу, тускай операцияга мөчээн маадырларның адын сиилбээн ZOV тураскаал - үш объект төлевилелде кирген.

Федералдыг программаны Тывага ажылдаткан бо чылдарда уруглар ойнаар болгаш спортчу шөлдер, сесерликтер, парктар болгаш кудумчулар дээш, шупту 145 хөй-ниити шөлдерин эде тудуп, чаагайжытканын сагындыраал.

Республикага тудуг сезону эгелей бээрге, эрткен чылын бүгү-российжи бадылаашкынга тиилээн объектилерни тудуп эгелээр.

Апрельдиң 30-ге чедир онлайн-бадылаашкын уламчылаар.