Тываның Соңгулда комиссиязы Президент соңгулдаларының баш бурунгаар түңнелдерин дыңнаткан

Тываның Соңгулда комиссиязы Тыва Республиканың девискээринге 2024 чылдың март 15, 16, 17-де эрткен Россия Федерациязының Президентизиниң соңгулдаларының баш бурунгаар түңнелдерин үндүрген.

Тыва Республикага март 15, 16, 17 хүннеринде Россия Федерациязының Президентизиниң соңгулдаларының бадылаашкыны 187 соңгулда участогунга эрткен.

Соңгулданың ажык-чарлыг хандырар дээш, Хөй-ниити хайгааракчыларының төвү болгаш бүрүткеткен 570 хайгааракчының хайгааралы-биле бадылаашкыннар эрткен. Соңгулда комиссиязының участоктарынга-ла ортумаа-биле 3 хайгааракчы ажылдаан.

Шупту 3 хүннүң дургузунда шупту соңгулда участоктарының бадылаашкын эртер 187 оран-савазынга болгаш 19 девискээр соңгулда комиссияларынга офлайн болгаш онлайн видео-бижидилгени хондур-хүнзедир чорудуп, республиканың соңгукчуларын 100 хуу хаара тудуп организастаан.

Оон аңгыда, 20 соңгулда участогунга соңгукчуларның бадылаан бюллетеньнериниң электроннуг санаашкынын чорудар комплекстерни (КОИБ-2017) салган.

34 журналист аккредитация (ук ажылга бүрүткел-чөпшээрел) эрткен 4 массалыг информация чепсээн төлээлеп, үш хүн дургузунда бадылаашкын чорудулгазын чырыдып ажылдаан.

Февраль 17-ден март 7-ге чедир республикага “ИнформУСК” төлевилелди боттандырган.

187 участок комиссиязының 668 кежигүнү 40 ажыг сооктар үезинде  бажыңнарны эргип ажылдаан. 20 хонук дургузунда 74178 өрегени азы участокка хамааржыр өрегелерниң 90,5 хуузун эргээн. Олар 205740 соңгукчунуң аразынга айтырыг-харыыны чорудуп, оларның 82,0 хуузу-биле чугаалашкан.

Бадылаашкыннарның баш удур медээлери-биле, соңгулдага 189824 соңгукчу киришкен, ол дээрге республикада соңгукчуларның даңзызында соңгукчулар санының 95,59 хуузу. Оларның иштинде хуусаа бетинде – 9548 (5,03 хуу) кижи, соңгулда участогундан дашкаар – 28 040 соңгукчу (14,78 хуу) бадылаан.

Протоколдарның 100 хуузун санап көрген соонда, бадылаан үннер мынчаар хувааттынган:
Владимир Путин – 95,37 хуу (180 902 үн);
Николай Харитонов (РФКП) – 2,10 хуу (3 990 үн);
Леонид Слуцкий (РЛДП) – 1,14 хуу (2167 үн);
Владислав Даванков («Чаа кижилер» партиязы) – 1,07 хуу (2039 үн) болган.