Россияның Тудуг яамызы Шагаан-Арыгның ЧЭТ-тен алган материалдарга лабораторлуг шинчилелдерни эгелээн

Тываның Баштыңы Владислав Ховалыг-биле Россияның тудуг болгаш ЧКА сайыды Ирек Файзуллинниң дугурушканы езугаар, марттың 13-14 хүннеринде республикага ажылдаан В.А. Кучеренко аттыг «Тудуг» эртем-шинчилел төвү» тудуг конструкцияларын шинчилээр Төп эртем-шинчилел институдунуң эксперттери Шагаан-Арыгның ЧЭТ-ке онза болуушкундан когараан демир конструкциялардан материалдарны алган.

«Өрт болган девискээрде конструкциялардан материалдарны алгаш, лабораторияже дамчыткан. Тутчу берген черлерде хос база дуглаглыг черлерде демирлерден кескиндизин база алган» - деп, Россияның Тудуг яамызының сайтызында дыңнаткан.   

Специалистер ЧЭТ-тиң кол тудуунда демир өзектерниң химиктиг тургузуун болгаш кол механиктиг шынарларын тодарадыр. Техниктиг документацияны өөренип көргеш, карак-биле көрүп, алган пробаларны шинчилээн соонда, комиссияның түңнелин тургузар. Ол түннелге даянгаш, Шагаан-Арыгның ЧЭТ-ин катап тургузарынга хамаарыштыр шиитпир үнер.

Шагаан-Арыгның ЧЭТ-те онза байдалдың уржуктарын чайладыр ажылдар уламчылавышаан. Бо хүнде объектиде үш котел ажылдар турар. Хоорайның социал болгаш чуртталга объектилерин чылыг-биле хандырар дээш, өске регионнардан республикаже чоруткан 13 блок-модульдуг котельнаяны ажылдаткан. Хөй аалдыг 62 бажыңже база социал ужур-уткалыг 20 объектиже чылыгны берген.