Тывада Масленицаны калбаа-биле демдеглеп турар

Бурунгу байырлал – Масленицага тураскааткан байырлал хемчеглери Тываның культура бажыңнарында болгаш төптеринде, школаларда, уруглар садтарында, немелде өөредилге төптеринде, библиотекаларда база музейлерде эртип турар. Концерт-театржыткан көргүзүглер, блинылар делгелге-садыглаашкыны, бурунгу ужурлар дугайында лекциялар, флешмобтар кайда-даа калбарган. Чоннуң байырлалын демдеглеп эрттирер республика хемчеглеринде 200 ажыг культура-хөглээшкинниг болуушкуннар бар.

Марттың 16-да Кызылда Аныяктар сесерлиинге Масленицаны демдеглээр. Чагы бажы үнери, ярмарка-садыглаашкыннар, оюн-тоглаалыг культура-хөглээшкинниг программа планнаттынган.

Марттың 17-де Орус культура төвүнге байырлыг оюн-көргүзүг кызылчыларны болгаш аалчыларны чалап турар.

Уругларны киириштирген хемчеглерже онза кичээнгей салдынган. Дүүн Сарыг-Сеп суурнуң төп кожуун библиотеказы «Кышты үдеп, Масленицаны уткуулуңар» деп блинылар быжырарынга фольклор-өөредиглиг мастер-классты организастаан. 2 дугаар школаның 10-гу клазының өөреникчилери киришкен ук хемчегге байырлалдың төөгүзүн, езу-ужурларын, кандыг оюннар ойнаарын чугаалашкан.

А.Б. Чыргал-оол аттыг Кызылдың уран чүүл колледжизинге кыш үдээшкинин эрттирген. Студентилер «Эх, блины мои блины...» конкурска киржип, чогаадыкчы номерлерни көргүзүп, ойнап-хөглээн. Жюри кежигүннери Масленицага тураскааткан ырылар болгаш кожамыктар күүселдезин шылгап, костюмнар шилилдезин кылган.

Туран хоорай баштайгы көжүп келген орустар парыгынга байырлалды демдеглээн. Кожуун чагыргазының культура килдизи аъш-чем болгаш көдээ ажыл-агый ярмарказын, «Масленицаның тулган өрегези» деп организациялар болгаш албан черлериниң ортузунга мөөрейни, хоорайның чогаадыкчы коллективтер концертин, чагы бажы үнер, “чучело” өрттедир көргүзүглерни белеткээн.