Тываның Баштыңы Шагаан-Арыгның ЧЭТ-ке ОБ үезинде алган кемдээшкининден Мерген Сарыг-оолдуң мөчээни-биле, ооң өг-бүлезинге кажыыдалын илереткен

Марттың 6-да Шагаан-Арыгның чылыдылга-энергетика төвүнге техногенниг озал-ондактан Мерген Сарыг-оол өрттенип кемдээн турган. Когараан кижини РФ-тиң Кадык камгалалының айыыл-халаптар медициназының федералдыг төвүнден келген эмчилерниң шинчээниниң соонда, Кызылда республиканың 1 дугаар эмнелгезинден Красноярск хоорайда крайның күрүнениң клиниктиг эмнелгезиниң өртең төвүнче марттың 7-де Россияның Онза байдалдар яамызының самоледу-биле ужуп чедирген.
Мерген Сарыг-оол Шагаан-Арыгның ЧЭТ-те котел дериг-херекселдерин септээр база хандырар слесарь кылдыр 2022 чылда ажылдап эгелээн. Өөнүң ишти база ийи ажы-төлү артып каан.
- Красноярск крайның өртең төвүнүң эмчилери төнчүзүнге чедир демисежип, бедик мергежилдиг дузаны көргүзүп турган. Ындыг болзажок, аар кемдээшкиннер ооң амы-тынын алгаш барган – деп, Владислав Ховалыг бижээн.
Республиканың Баштыңы мөчээн кижиниң өг-бүлезинге республика бюджединден 1 млн рубльди аңгылап бээрин, Красноярск хоорайдан мөчүзүн эккээринге дузалажырын, чарлыышкын езулалын организастажырын дыңнаткан.