Тывада Шагаан-Арыгның ЧЭТ-инге озал-ондактың уржуктарын чайладырынга Сибирь регионнары биле Москва дузалашкан

Тывага дүрген болгаш бүгү талалыг дузаны көргүскенинден, Шагаан-Арыгда ЧЭТ-ке авариядан чидириглер элээн эвээш болган. Республиканың Баштыңы Владислав Ховалыг ТР-ниң чазааның неделяның хуралынга ооң дугайында дыңнаткаш, дуза катканнарга четтиргенин илереткен.

Чылыдылга-энергетика төвүнде ажылдарга 300 ажыг киришкен. «Оларның аразында Сибирь регионнарындан энергетиктер болгаш чылыдыкчылар дээш, улуг компанияларның төлээлери, сайгарлыкчылар, эмчилер, өөредилге, культура, спорт, бизнес ажылдакчылары, волонтерлар болгаш айыылга таварышкынарга дуза кадыксаан өске-даа кижилер бар. Кижи бүрүзүнге четтиргеним илередип тур мен» - деп, Владислав Ховалыг чугаалаан.

Аварийлиг катап тургузуушкун ажылдарын дүрген болгаш дээштиг организастаарынга дузалашканы дээш, сайыт Ирэк Файзуллин база ооң оралакчызы Алексей Ересько баштаан Россияның Тдуг яамызынга өөрүп четтиргенин аңгы илереткен. Тываның Баштыңы дуза дилээн ооң кыйгырыынга харыыны бергени дээш, губернатор коллегаларын онзалап демдеглээн.

Хакасия, Красноярск база Алтай крайлар, Кемерово, Новосибирск база Омск областары авария соонда ол-ла дораан харыылаан. Тываже ниитизи-биле изидир үндүрер 435 херекселди база чылыдыкчыны, 13 модульдуг котелдарны чоруткан. 25 градус сооктарда, оларның ачызы-биле бажыңнар иштин доңурбайн, бүдүн-бүрүн камгалап арттырып алган.

Өртеңнер талазы-биле тускай мергежилдиг 13 кижи составтыг эмчилер командазы Онза байдалдар яамызының борту-биле Москвадан Кызылга ужуп келген. Олар хөмүр ыжындан частыышкынга балыгланган кижилерни шинчип көрген. Оларның түңнээни-биле, аар байдалдыг кижилерни Краснояск крайның эмнелгезинге бедик технологиялыг эмчи дузазын көргүзер кылдыр чоруткан.

Шагаан-Арыгның ЧЭТ-ке авария соонда беш дугаар хүнүнде, азы марттың 11-де, чылыг бээр шугумну катап ажыглалче киирип, 2 котелду база 9 мобильдиг котельнаяны ажылдаткан. Хөй аалдыг 62 бажыңның 59-зун чылыг хандырылгазында кошкан. Квартираларда температура +14-ден +22 градус болуп турар.

Шагаан-Арыгның школачыларынга марттың 11-ден 20-ге чедир часкы дыштанылганы чарлаан. Ол үеге чедир хоорайның чылыг хандырылгазы долу ажылдап, бажыңнарда температура санитарлыг нормаларга дүгжүп турар апаар.