Оперативтиг штабтың шиитпири-биле Шагаан-Арыгның школачыларында хуусаа бертиниң дыштанылгазын чарлаан

“Шагаан-Арыгның өөредилге черлерин чылыгга кошкан, чылыгның температуразы 20-22 градус – деп, Тываның Баштыңы дыңнаткан. - 18 социал объектилерниң 13-үнде чылыг кииртинген. Төп кожуун эмнелгези, 1, 2 дугаар школалар, уругларның уран чүүл болгаш спортчу школалары, 2, 4, 5 дугаар уруглар садтары, культура төвү, тудуг техникуму, Өг-бүлеге болгаш уругларга социал дуза төвү, «Эне-Сай» муниципалдыг автономнуг албан черинде чылыг бар”.

Баштыңы Владислав Ховалыг Россияның тудуг болгаш ЧКА сайыды Ирек Энварович Файзуллин-биле доктаамал харылзаада ажылдап турар. Сайыттың оралакчызы Алексей Васильевич Ересько-биле Шагаан-Арыгда онза байдалдың уржуктарын чайладыр удуртулга ажылының боттуг системазын тургускан. Модульдуг котельнаяны тургузуп эптээр ажылдарда республиканың ажылчын бригадалары болгаш Сибирь регионнарындан келген специалистер хаара туттунган. Сөөлгү медээ-биле алырга 13 мобильдиг станцияларның чедизи чылыгны берип турар, бо шактарда арткан котельнаялар ажылдап эгелээр.

Ол ышкаш Шагаан-Арыгның чылыдылга-энергетика төвүнде чылыг дамчыдар конвейер  шугумун септелге соонда, катап ажылдаткан. Ийи котел ажылдап эгелээн.

Ооң-биле чергелештир бажыңнарже чылыгны план езугаар кожуп турар. Хөй аалдыг 62 каът бажыңның 46-зы чылыгда коштунган.  

         Социал объектилерже чылыгны берген-даа болза, системаның ажылын өйлеп-таарыштырарынга ам-даа үе херек. Ынчангаш оперативтиг штабтың шиитпири-биле, Шагаан-Арыг хоорайның школачыларының дыштанылгазын марттың 11-ден 20-ге чедир хуусаа бертинде эрттирерин чарлаан. Республиканың Өөредилге яамызы биле Росхереглекчилер хайгааралы уруглар садтарынга дежурный бөлүктерни ажыдар айтырыгны шиитпирлеп турар.