Шагаан-Арыгның ЧЭТ-ке өрттен когараан сес кижини Красноярск крайның клиниктиг эмнелгезинче чоруткан

Тываның Баштыңы Владислав Ховалыгның дыңнатканы болза, Шагаан-Арыгның ЧЭТ-ке өртке когараан байдалы берге сес кижини Красноярск хоорайда крайның күрүнениң клиниктиг эмнелгезиниң өртең төвүнче Россияның ОБЯ самоледу-биле чоруткан.

- Россияның кадык камгалал сайыды Михаил Альбертович Мурашконуң даалгазы-биле, Тывада дүне ужуп келген Россияның айыыл-халаптар медициназының федералдыг төвүнден специалситерниң хөй угланыышкынныг бригада эмчилериниң киржилгези-биле консилиум соонда, ындыг шиитпир хүлээп алдынган – деп, Владислав Ховалыг чугаалаан.

Өрт үезинде 23 кижи когараан. Шагаан-Арыг хоорайда Улуг-Хемниң муниципалдар аразында медицина төвүнден 15 кижини – аар байдалдыг ийи кижини, берге беш кижини, ортумак байдалдыг сес кижини дүрген эмчи дузазының автомобильдери база вертолет-биле Кызыл хоорайда республиканың 1 дугаар эмнелгезинче эккелген. Арткан когарааннарны эмчилерниң хайгараалынга амбулаторлуг эмнээшкин алыр кылдыр чандырган.

Кызылче эккелген 15 кижиниң бирээзиниң өртеңнери чүгээр болганындан үндүр бижээнин, а сес кижини Красноярскиже чорутканын, ТР-ниң Кадык камгалал яамызы дыңнаткан.

Республиканың 1 дугаар эмнелгезинде когараан алды кижи арткан: токсикология салбырында - үш, өртең салбырында - ийи база травматологияда бир кижиниң байдалы турум.

Эмнелгеде чыттырган кижилерге Россияның Кадык камгалал яамызының Гельмгольц аттыг карак аарыгларының НМШ төвүнүң, А.В. Вишневский аттыг хирургия НМШ төвүнүң, Приволжьениң шинчилелдиг медицина университединиң база Красноярск хоорайда крайның клиниктиг эмнелгезиниң специалистери-биле телемедицина консультацияларын чоруткан.