Шагаан-Арыгның ЧЭТ-инде бир котелду ажылдаткан, а ийизи белен

Бо дүне ажылдаткан бир котел бүдүн хоорайның хоорзаларынга 40 градус чедир чылыгны тудар ужурлуг. Чылыг хандырылгазының шугумун түр үениң схемазы-биле катап ажылдадып эгелээн.

"Хоорайның одалга системазында суг эргилдези чоруп эгелээн. Ам ийи котелду ажылдадырынга белеткээн. Хөй аалдыг бажыңнарда үрелген хоорзалар бар бе дээш, база оларны дүрген септээри-биле хынап чоруп турар" - деп, Тываның Баштыңы Владислав Ховалыг бодунуң блогунда дыңнаткан.

Тываның одалга болгаш энергетика сайыды Эдуард Куулар кылдынган ажылдарны чугаалаан: "Хоорайның улуг чылыг оруунче чылыгны берген. Бөгүн ийиги котелду ажылдадыр бис. Чылыгны улгаттырары-биле, септеп-селиир ажылдар чоруп турар".

Кызыл, Ак-Довурак хоорайлардан, Хову-Аксы база Чаа-Хөл суурлардан специалистер аварийлиг-катап тургузуушкун ажылдарында киржип турар деп, сайыт чугаалаан. Хакасиядан 3,5 МВт күчүлүг мобильдиг котельная чедип келген. Чылыг четкизинге мобильдиг котелду салыр черин белеткээн. Бөгүн Москва, Кемерово, Новосибирск база Красноярсктан котелдер кээр ужурлуг.

Тываэнерго, Кызылдың ЧЭТ дээш, республиканың чылыг-энергетика комплекизиниң база чуртталга-коммунал ажыл-агыйының өске-даа организациялары котельнаяның катап тургузуушкун ажылдарынче күштерин болгаш курлавырларын хаара туткан. Москва, Новосибирск болгаш өске-даа хоорайлардан дериг-херекселдер кээп турар.

Бо эртен Красноярсктан Ан-74 борт Кызылга 10 шакта ужуп чедип келген. Россияның ОБЯ-зы 80 чылыг үндүрүкчүлерин база 200 электроконвекторларны эккелген. 15 шакта 4 модульдуг котел база контейнеровоз чүдүрген борт ужуп келир. Кемероводан чер оруктап чүъктүг бир транспорт чоруп олурар.