Хөй ажы-төлдүг ие Долаана Дамдын: "Өг-бүле" национал төлевилелдиң боттанылгазы өг-бүлелерге детикмчелиг хемчег апаар

Президентиниң Федералдыг Хуралга Айыткалында социал адырны деткиир хемчеглер дугайында хөйнү дыңнаткан. Владимир Путин «Өг-бүле» деп аттыг чаа национал төлевилелди идип үндүрген.

"Россия" делгелге-шуулганының үезинде, Өг-бүле чылының ажыдыышкын езулалында, өөнүң ээзи Леонид Дамдын-биле Тыва Республиканың төлээлеп чораан хөй ажы-төлдүг ие Долаана Дамдын өг-бүле политиказының республикага салдарынга хамаарыштыр бодунуң үнелелин берген:

- Чурттуң Баштыңы Өг-бүле чылында «Өг-бүле» национал төлевилелди боттандырар деп чарлааны, чөптүг. Хөй ажы-төлдүг бистиң республикага чаштарның өзүп-төрүттүнеринге ол улуг деткимче. 2030 чылга чедир үшкү чаш төрүттүнгенде 450 муң рубльдиң төлевир акшазын ипотека төлээринге киириштирип болур дээни, дыка эки-дир. Бистиң республикада 2 хуулуг чиигелделиг чуртталга ипотеказының бары чуртталга байдалын экижидеринге күрүнеден дээштиг дуза-дыр. «Ие капиталы» программаны 2030 чылга чедир узатканы, ажы-төлдүг өг-бүлеге улуг деткимче.
Хөй ажы-төлдүг ие кижиге меңээ, ажы-төлдүң сагыш-сеткил-угаан-медерел кижизидилгези чугула черни ээлеп турар. Президентиниң инициативазы-биле боттандырган «Пушкин картазы» программа аныяк салгалды культура болгаш уран чүүлче хаара тударынга эптиг арга. Владимир Путин ол картаны ам-даа ажылдадырын дыңнатты.