Тываның саң-хөө сайыды Орлан Достай: бюджет чээлилеринден үндүр бижээн акша-хөреңгини чаа төлевилелдерже угландырар

Президент Владимир Путин Федералдыг Хуралга Айыткалында регионнарның хөгжүлде айтырыгларынга аңгы доктааган. Күрүнениң баштыңы Россия Федерациязының субъектилериниң өре чүъгүн эвээжеткеш, 2025-2028 чылдарда 200 млрд ажыг рубльди чыл санында-ла камнап ап болурун саналдаан. Тывага 1,3 млрд ажыг рубль-дир, ону чаа экономиктиг төлевилелдерже угландырып болур.

«Регионнарның бюджеттер чээлилеринде өрезиниң 2/3 кезиин үндүр бижиири чугула деп санап тур мен. Ол акша-хөреңгини инвестицияларны база инфраструктура төлевилелдерин деткииринче тускай сорулгалыг угландырар херек» - деп, Владимир Путин чугаалаан. Президент 2030 чылда шупту регионнар бот чедимчелиг апаар ужурлуг деп демдеглээн.

Тыва Республиканың саң-хөө сайыды Орлан Достай Президентиниң айыткалынга хамаарыштыр бодунуң бодалын илереткен. «Бистиң таварылгада 1,3 млрд ажыг рубльди үндүр бижиириниң дугайында чугаа чоруп турар, ону республиканың экономиказын хөгжүдер чаа экономиктиг төлевилелдерже угландырар» - деп, Достай тайылбырлаан.