Тываның Баштыңы Владислав Ховалыг Россияның энергетика сайыды Николай Шульгинов-биле ужурашкан

Тываның Баштыңы Владислав Ховалыг Москва хоорайга ажыл-агыйжы сургакчылаашкын үезинде, Россия Федерациязының энергетика сайыды-биле ужурашкан. Ийи удуртукчу республиканың үлетпүр болгаш социал адырында чырык хандырылгазының инвестиция төлевилелдериниң комплекстиг планының күүселдезин, регионче газты кирериниң аргаларын сайгарып чугаалашкан.

2021 чылда РФ-иң Чазааның бадылааны энергетика хандырылгазының комплекстиг планы 2023 чылда амыдыралда боттанып эгелээн. Республикада планның кол пунктуларын «Россети» компания күүседир. 2023 чылда «Россети» инвестиция программазының планы-биле 220 кВ «Кызылская» подстанцияда чаа автотрансформаторну ажылдаткаш, Кызыл агломерациязының чырык хандырылгазын быжыглап, республиканың Төп, Мурнуу база Чөөн энергорайоннарын хөгжүдеринге инфраструктура негелделерин хандырган. Компания ооң аңгыда, Бии-Хем биле Тожу кожууннарның чедери берге девискээрлеринде чырык дамчыдылгазының «Туран – Туманная» шугумун тудуп турар. Ол шугум алызы барып Ак-Сугнуң даг-болбаазырадылга комбинадын чырыкка кожар.

Амгы үеде эде тудуушкун ажылдары чоруп турар «Хандагайты» (Россия) – «Боршоо» (Моол) эрттирилге пунктузунуң чоогунга тудар онза экономиктиг зона инвестиция төлевлелинге база чырык хандырылгазы негеттинип турар. Владислав Ховалыг экономиктиг зона ажылдай бээрге, немелде чырык күчүзү херегин Николай Шульгиновка тайылбырлааш, ол айтырыгны шиитпирлээринге деткимчени көргүзерин федералдыг сайыттан дилээн.

Владислав Ховалыг ооң аңгыда, регионну газификастаарының санаашкыннарын Николай Шульгиновка таныштырган. Республиканың төвү Кызыл хоорай «Экология» национал төлевилелдиң «Арыг агаар» федералдыг программада киржип турарын сагындыраал. Федералдыг программа хемчеглери-биле регионнуң найысылалын газ-биле хандырар ийи арганы көрүп турар. Бир дугаарында, «Газпром»-дан азы бойдус газының чыдынындан тырый баскан бойдус газын бүдүрер база ажыглаар инфраструктураны тударының аргазын көөр. Томск, Кемерово, Новокузнецк, Горно-Алтайск хоорайларже ышкаш, республикаже суугаткан бойдус газын киир сөөртүп болур.

«Энергетика яамызының удуртулгазы Тыва дээн ышкаш чамдык субъектилерни бойдус газы-биле автономнуг газификастаар төлевилелди Россия Федерациязының Чазаанче өөренип көөр кылдыр киирер болган» - деп, Владислав Ховалыг ужуражылганың түңнелин дыңнаткан.