Россияның төөгү ниитилелиниң Тывада регионалдыг салбырын тургускан

Республика Чазааның бажыңынга ниитилелдиң баштаар чериниң даргазы, «Ада-чурт төөгүзү» фондунуң күүсекчи директору Руслан Гагкуевтиң киржилгези-биле салбырның тургузукчу хуралы болуп эрткен. ТР-ниң Чазааның чанында Тываның гуманитарлыг болгаш тускай социал-экономиктиг шинчилелдер институдунуң директору, төөгү эртемнериниң кандидады Вячеслав Март-оолду Россияның төөгү ниитилелиниң Тывада регионалдыг салбырының удуртукчузунда томуйлаан.

Тываның Баштыңы Владислав Ховалыг бодунуң блогунда ниитилелдиң регионалдыг салбырын ажытканынга хамаарыштыр бодалын илередип тура, республикага онза төөгүлүг чылда ооң ажыттынганы ужур-дузалыг деп демдеглээн.

«Совет Эвилелиниң составынче республиканың эки тура-биле каттыжып киргениниң 80 чылынга тураскааткан хемчеглерни, делегей чергелиг эртем-практиктиг конферен­цияны белеткээринге болгаш эрттиреринге, Тываның төөгүзүнүң өөредилге номун доозарынга идепкейлиг дузалажырынга  бүзүреп турар бис» – деп, Владислав Ховалыг чугаалаан. 

Сибирь федералдыг округда ниитилелдиң салбырларының удуртукчулары, республиканың кол культура, эртем болгаш өөредилге албан черлериниң төлээлери тургузукчу хуралга боттары база видеоконферения харылзаазы-биле киришкен. Хуралдың киржикчилери бо база дараазында ийи чылдарның төөгүлүг хүннерин көрүп тургаш, салбырның ажыл планын сайгарган.

Эрткен чылдың майда Тываның Чазаа Ада-чурттуң болгаш төрээн чериниң төөгү айтырыгларын шинчилеп чоруур тыва эртемденнерниң база специалистерниң инициативтиг бөлүүнүң Россияның төөгү ниитилелиниң Тывада регионалдыг салбырын ажыдар дугайында саналын деткээнин сагындыраал.

«Тыва Республикада салбырны ажытканы республиканың бодунда ниитилелди быжыглаарынга, өске регионнардан төөгүчүлер-биле удур-дедир харылзаазы тургузарынга идиглиг» - деп, ниитилелдиң баштаар чериниң даргазы Руслан Гагкуев чугаалаан.