Тываның Баштыңы шериг албанныгларга база корум-чурум камгалаар органнар ажылдакчыларынга күрүне шаңналдарын тывыскан

Тываның национал хөгжүм-шии театрынга Ада-чурт камгалакчызының хүнүнге тураскааткан байырлыг хемчегде ажыл албанынга шылгараан шериглерни база корум-чурум камгалакчыларын шаңнап-мактаан. Республиканың Баштыңы Владислав Ховалыг маадырларга күрүне шаңналдарын тывыскан.

 «Бо хүн - Россияның аңгы-аңгы салгалдарын доңнаштырган. Төрээн чуртувустуң эрткен алдарлыг шериг үезиниң маадырларынга мөгейип, амгы үеде ТШО зоназында, холда окту-боону туткаш Россияның келир үезин камгалажып турар оолдарга хүндүткелди илередип тур бис. Бирги одуругда бистиң чаңгыс чер чурттугларывыс маадырлыг тулчуп чоруурунга чоргаарланып тур бис» - деп, Владислав Ховалыг социал четкилерде бодунуң блогунда бижээн.

 Байырлал бүдүүзүнде 55-ки аңгы мотоадыгжы бригаданың хууда составы Донецкиде Авдеевка хоорайны хосташкан дугайында медээ келгенин Тываның Баштыңы сагындырган. Дээди кол командылакчы Владимир Путинниң Авдеевканы украин неонацистерниң бүзээлелинден хостажырынга бистиң оолдарның көргүскен эрес-дидим, маадырдыг чоруун демдеглээн –деп, республиканың удуртукчузу чугаалаан.

Владислав Ховалыг Ада-чурт камгалакчызының хүнү-биле байырын чедирип, бөгүн залда келген солдаттар болгаш офицерлерниң, тускай операция киржикчилериниң, оларны деткээн төрээн болгаш чоок кижилериниң киржилгези-биле Тиилелге чоокшулап келгенин чугаалаан.

Тыва Республика Баштыңының Өөрүп четтириишкинин Росгвардияның ТР-де эргелелиниң  тускай сорулгалыг күштер бөлүүнүң начальниги Арбын Кууларга чарлаан.

Тыва Республиканың Баштыңының Хүндүлел бижиин:

- 55-ки аңгы мотоадыгжы бригаданың шериг албанныглары - Родион Бичи-оолга, Александр Дупчурге, Анатолий Донгакка, Омак Лопсанга, Ахмед Максидовка, Евгений Тюлюшке, Чингис Хомушкуга, Саян Уйнукай-оолга;

- Россияның ФАА Тыва Республикада Кызыгаар эргелелиниң бөлүүнүң улуг инструктору, улуг прапорщик Буян Самбылага тывыскан.

«Тиилелге хүнү» тураскаал медальды:

- Росгвардияның ТР-де эргелелиниң  улуг опертөлээзи, майор Буян Бижикке;

- Росгвардияның ТР-де эргелелиниң   хөй-ниити чурумун камгалаар база камгалал хемчеглеринде дайнычыларның киржилгезин хандырар салбырның начальниги, подполковник Владимир Никулинге тывыскан.

Улуг чүък машиназының чолаачызы Аймир Номчулага тускай шериг операциязының киржикчилеринге гуманитарлыг дузаламчы чедирилгезинге идепкейлиг киришкени дээш, 127 мотоадыгжы бригаданың командири Өөрүп четтириишкинни чарлаан.