Тываның кожууннар аразының чамдык оруктарында хөртүктей хадаан черлерни аштаан

Күштүг хаттар кожууннар аразында оруктарны хөртүктээн. Кызыл, Өвүр база Мөңгүн-Тайга кожууннарның оруктарында аар техника ажылдап үнген. Россияның Онза байдалдар яамызының Тыва Республикада кол эргелели ол угланыышкыннарже орук-суур үнерин шеглээринче чолаачыларны кыйгырган.

Кызыл кожуунда «Кызыл – Ээрбек – Баян-Кол – Терлиг-Хая»; «Мугур-Аксы – Кызыл-Хая», «Мугур-Аксы – Хандагайты»; «Хандагайты – Ак-Чыраа» авторуктарда хөртүктей хадаан участоктар барын сагындырган.

Орукчулар ийи грейдер база үстүрер техникалыг Ээрбек, Баян-Кол и Терлиг-Хая суурларже орук аштаашкынынче киргенин Кызыл кожуун чагыргазы дыңнаткан. 

Мөңгүн-Тайга кожуун чагыргазының дыңнатканы-биле алырга, «Мугур-Аксы – Кызыл-Хая», «Мугур-Аксы – Хандагайты» оруктарда улуг-даа, бичии-даа машиналарга орук чок. Аар техникалар орукту үстүрүп, шалыпкын ажылдап турар.

Баш удур көрдүнмээн таварылгалда 112 дугаарлыг телефонче дыңнадыгны киирерин сагындырган.