Кызылда өрттен когараан өг-бүлелерге дуза чедирилгезин организастаан

Дүүн Тываның найысылалында, Спутник микрорайонунда Эрзинская кудумчузунда, хөй аалдыг ийи каът бажыңга өрт болган. Кызылда Өртчү харылзааның төп пунктузунче 16.38 шакта дыңнадыг кирген. Өрттү өжүрген, өртчүлер ышталган квартиралардан беш кижини уштуп, амы-тынын алган.

Өрттүң үнген чылдагааны – от-биле серемчилел чок болганындан, азы чедир өжүртүнмээн таакпыдан ыяш бажыңда квартираларның бирээзинге өрт өөскээн. Угарлыг ыштан ийи кижи когараан, оларны республика эмнелгезинде чыттырган. Бир кижи байдалы чүгээр болганындан эмнелгеге чыдарындан ойталаан, ийиги кижини токсикология салбырында чыттырган.

Ийиги подъездиниң дөрт квартиразын өрт шыва алган, камгалакчылар өрттенмээн чүүлдерни үндүрген. Бажыңның бирги подъездизинде квартиралар өрттен өршээлдиг болуп, анаа болган. Ол-ла кежээ бажыңче төпчүткен чылыгны катап берген, бөгүн чырык дамчыдылгазын кожар ужурлуг.

Владислав Ховалыг айыыл-халап болган дораан, өрттен когараан квартиралардан өг-бүлелерге чогуур дузаны көргүзер даалганы берген. Тываның Чазаанга, чазак даргазының оралакчызы Виталий Бартына-Садының удуртканы хуралга, регионалдыг хамааты камгалал болгаш онза байдалдар албанының удуртукчузу Евгений Овсянников биле Кызылдың мэри Карим Сагаан-оол когарааннарга кандыг дуза көргүстүнгенин илеткээн.

Өрт дугайныда бирги дыңнадыг соонда, ийи шактың дургузунда, Иван Ярыгин аттыг спорт комплекизиниң баазазынга түр када чурттаар 40 оруннуг №1 пунктуну ажыткан. Өрттен когараан бажыңның ийи подъездизинден шупту чурттакчыларны, азы 39 кижини №1 пунктуже автобус-биле чайладып көжүрген. Хонар кылдыр 12 кижи арткан, оларның үжү бичии уруглар. Эмчилер шуптузун шинчээн. Полиция болгаш Росгвардия ажылдакчылары айыыл чок чорукту хандырган, изиг чем-биле үш катап чемненилгени организастаан. Полицияның, мэрияның база башкарыкчы компанияның күжү-биле өрттен когараан бажың чанынга хондур дежурныйлаашкынны чоруткан.

Өрттен когарааннарга хоорай бюджединден чаңгыс катап бээр дузаламчыны көргүскен. Ам бо хүнде чурттаар чер чок арткан өг-бүлелерниң улаштыр каяа чурттаарының айтырыын шиитпирлеп турар.