Тывада Өг-бүле чылынга тураскааткан хемчеглер планы бадылаттынган

Тываның Баштыңы Владислав Ховалыгның айтыышкыны-биле, Президент Владимир Путинниң чарлааны Өг-бүле чылынга тураскааткан хемчеглерни эрттирер республиканың организастыг комитедин тургускан. Чазак даргазының оралакчызы Орлан Сарыглар ону удуртуп башкарар.

Тывага Өг-бүле чылын эрттирер планның элээн каш кезээнде чүс ажыг хемчег кирген. Регионнуң эрге-чагырга органнарының, хөй-ниити институттары болгаш ниитилелдериниң база чурттакчы чоннуң киржилгези-биле ажы-төлдүг өг-бүлелерниң байдалын сайзыраңгайжыдарынче, үре-салгал чаяар хамаатыларның кадыкшылын камгалаарынче, ада-иениң харыысалгазын быжыглаарынче угланган информастыг-коммуникация, культура-массалыг, спортчу болгаш хөй-ниити хемчеглери организастаар.
Конкурстар, форумнар, спортчу маргылдаалар, акциялар, теледамчыдылгалар, ток-шоу, флэшмобнар, эртем-практиктиг конференциялар, өөредилге курстары, семинарлар, Ажык эжиктер хүннери, мастер-класстар болгаш өске-даа хемчеглер өг-бүлениң, хөй ажы-төлдүг база хөй салгалдарлыг болурунуң алдар-адын көдүрүп, бадылгага, ада-ие апаарынга эки бодалды, улуг кижилерге база төрээн бажыңынга төлептиг хамаарылганы хевирлээринге идигни бээр.

Тывага Өг-бүле чылында болур улуг хемчеглер:
- февраль 20-де «Тыва ниитилелде өг-бүле кижизидилгези: ужур-чаңчылдар болгаш амгы үези» төгерик стол,
- мартта «Чылдың өг-бүлези» бүгү-российжи мөөрейниң регионалдыг чадазы,
- марттың 5-6-да «Херээженнер: езу-чаңчылдарны кадагалап — Россияны хөгжүдээлиңер» деп бүгү-российжи херээженнер шуулганы,
- март биле майда «Чедиишкинниг өг-бүле – чечектелген Тыва» VI иелер шуулганы,
- мартта өскүс болгаш ада-иезиниң хайгааралы чок арткан уруглар аразынга «Херелденген чырык» деп республиканың уруглар чогаадылгазының конкурузу;
- июль 5-те Өг-бүле, ынакшыл болгаш шынчы чорук хүнүнге тураскаадып «Ынакшыл болгаш шынчызы дээш» деп медальдарны тыпсыр байырлыг хемчег;
- июль 5-те Өг-бүле, ынакшыл болгаш шынчы чорук хүнүнге тураскааткан Өг-бүлелер чыскаалы;
- июнь 12-де база ноябрь 4-те интернационалчы өг-бүлелерниң байырлыг бадылажылгазы, үлегерлиг интернационалчы өг-бүлелерни хүндүткеп байырлаары;
- августа «Наадым-2024» малчыннар байырлалында малчын өг-бүлелер ортузунга «Малчын өг-бүле» республика мөөрейи;
- сентябрьда Өг-бүле чылынга база Кызыл хоорайның 110 чылынга тураскаадып, «Ынак чүректерден – ынак хоорайынга» деп аныяк өг-бүлелерниң куда чыскаалы;
- октябрьда регионнар аразының «Сибирьниң уруглары» элээдилер болгаш студент аныяктарның шуулганынга республиканың киржилгези;
- октябрьда «Төлептиг ада» деп хөй-ниити үнелээшкининиң мөөрейи;
- «Солдаттың адазы» деп хөй-ниити үнелелиниң медалын тыпсыры;
- Узун назылыглар хүнүнге тураскаадып хөй салгалдарлыг өг-бүлелерни шаңнаары;
- ноябрь 4-де «Аас-кежиктиң тодарадылгазы: 1+1=6»деп хөй ажы-төлдүг өг-бүлелерниң республика фестивалы.
Ажыл-чорудулганың аңгы-аңгы адырларында ажылдап турар, шупту хар-назынның кижилери киржир кылдыр планны тургускан