Тывадан тускай шериг опреациязының зоназынче ужудукчу чок ужар аппараттарны чорудар

ТР-ниң Чазааның деткиишкини-биле кылган чүс хире улуг күштүг квадрокоптерларны ТШО зоназынче чорудар. Тываның Баштыңы Владислав Ховалыг шинчилел-хайгыылга база ажыглаар дроннарны шериг ужудукчу чок аппараттар операторлары белеткээр төпте чыып белеткээнин көрген. Бүдүрүлге хемчээлин улгаттырар, ужудукчу чок ужудар аппараттар башкарар мергежилдиг операторлар белеткээр планныг төпке регионнуң удуртукчузу деткимчени ам-даа көргүзеринге беленин чугаалаан.

- Дроннар бүдүрүлгезиниң шугумун төп калбартыр планныг. Чаа партияда ужудукчу чок ужар ийи улуг аппарат база бар. Фронтуга ону халдаар квадрокоптерлар сигналын дамчыдарынга ажыглаар. Ынчалдыр дайынчы машиналар ужудуушкунунуң радиузу улгадып, тей азы бедик чер артындан халдаарынга эптиг арга магадылаттынар – деп, Владислав Ховалыг белеткел төвүнге чораан соонда бижээн.

«Ирбис» деп шолалыг тускай шериг операциязының хоочуну дроннар бүдүрүлгезин эрткен чылдың төнчүзүнде эгелээн. Чыып кылган ужудукчуларны опреаторлар белеткелинге ажыглап турган. Тываның Баштыңы Владислав Ховалыг январь эгезинде цехке чорааш, ооң ажылын деткиир күзелин илереткенин сагындыраал. Регион Чазааның деткиишкини-биле бүдүрүлгениң хемчээли улгаткан, амгы үеде аппараттар шугумун ам-даа калбартыр дээш белеткел чоруп турар.

Ужудукчу чок ужар чүүл операторлары белеткээр шынзылгалыг төп 20 ажыг специалистерни доостурган. Операторлар дроннарны чыып тургаш, чүгле ужударынга эвес, а дайын шөлүнге аппараттарны программалап, септеп-селииринге база өөредип турар. Дайынчылар ТШО зоназында эштери-биле билиглерин үлежир.