Тываның эпидемиолог эмчилери грипп болгаш ОРВИ аарыының ийиги чадазы көдүрлүп болурун сагындырган

Чыл эгезинден республикада 10 муң чурттакчыга онааштыр грипп болгаш ОРВИ-ден аараан 834 таварылга бүрүткеттинген, эпидемиологтуг деңнелге 72,5 хуу четпес. Эрткен неделяга деңнээрге аарыг 14,8 хуу эвээжээнин, Тываның кол санитар эмчизи Людмила Салчак дыңнаткан. Ындыг болзажок, санитар-эпидемиологтуг хемчеглерни суларадып болбас деп, эпидемиолог эмчи айыткан. Грипп болгаш ОРВИ аарыының катап көдүрлүп болурунуң айыылы бар болганда, профилактиктиг хемчеглерни уламчылаары чугула.

2023 чылдың декабрь төнчүзүнде республикага грипптен аараан бирги таварылга бүрүткеттинген, оон бээр грипптээн 296 таварылга лабораторияга бадыткаттынган. 97 таварылгада улуг улус аараан. А 17 харга чедир бичии уруглар аразындан 199 таварылганы илереткен.

Эпидемиологтарның бодалы-биле алырга, лабораторлуг шинчилелдер түңнелинден көөрге, регионда грипптиң А/H3N2, А болгаш А/Н1N1 хевирлери эргилип, аарыгның ийиги чалгыы бооп болурун оштап турар.

Оон аңгыда, республикада сезоннуг коронавирус биле COVID-19 аарыы ам-даа таварышпышаан. Февральдың 5-тен 11-ге чедир чаа коронавирус халдавырындан 8 кижи аараан, оларның аразында 6 улуг, 17 харга чедир назылыг 2 уруг бар.

Республиканың Кадык камгалал яамызы холдарны чуп, хөй кижилер чыылган черлерге маскаларны кедип, гаджеттерин аштап чүлгүүр профилактика хемчеглерин сагыырынче хамаатыларын кыйгырган. Чугаалажып турган кижизинче эмин эртир чоокшулавас. Ол ышкаш грипп болгаш ОРВИ-ниң эпидсезону эгелээнден бээр эмнелге организацияларында маска чуруму чоруп турарын ведомство сагындырган.