Афганистандан совет шериглерни үндүрген хүнден 35 чылынга тураскааткан хемчеглер Тывада эртип турар

1989 чылдың февраль 15-те Афганистандан эң сөөлгү совет шериглерни үндүрген. Афган дайынындан ээп келбейн барган 14 муң ажыг совет солдаттар болгаш офицерлерге тураскаадып ол хүннү доктааткан. Ада-чурттан дашкаар албан хүлээлгезин күүседип чораан дайынчыларга мөгейиг кылдыр Кызылда Тиилелге шөлүнге байырлыг митинг база чечектер салыр езулал ол хүн болур. В. Көк-оол аттыг Национал хөгжүм-шии театрынга байырлыг концертти «Тыва» КТРК дорт дамчыдар.

Февраль 15-те чүгле афган дайынының хоочуннарын эвес, а чурттан дашкаар 30 хире дайынчы чөрүлдээлерге киржип турган өске-даа российжи шериглерни сактып чугаалажыр. Россия Федерациязында 2011 чылдан бээр Ада-чурттан дашкаар албан хүлээлгезин күүседип турган российжилерге сактыышкын хүнүн демдеглеп турар. Ол хүнге тураскаал кылдыр дайынчы хөделиишкиннер хоочуннарының, эрге-чагырга, хөй-ниити база аныяк салгалдың шериг-патриотчу кижизидилге албан черлериниң төлээлериниң киржилгези-биле байырлал болгаш сактыышкын хемчеглери, митингилер, конкурстар болгаш акцияларны эрттирери чаңчылчаан.

Республиканың 500 ажыг чурттакчызы бистиң чурттан дашкаар дайынчы даалгаларны күүсеткен. Совет Эвилелиниң хостакчы хүлээлгезинге 400 ажыг тыва интернационалисчи шериглер киришкен. Он кижи Кызыл сылдыс Ордени-биле шаңнаткан, оларның үжү – мөчээниниң соонда, 24 кижи – «Эрес-дидим чоруу дээш» база «Дайынчы ачы-хавыяазы дээш» медальдарга төлептиг болган. 300 хире кижи «Афган чондан өөрүп четтириишкин» медалы-биле шаңнаткан.

Тываның шериг комиссариады салгалдар ону утпазын дээш «Аныяк армейжилерниң көрүжү-биле Афганистан» деп бичии уругларның чурук конкурузун чылдың-на эрттирип турар. Бо чылын конкурсту «Юнармия» бүгү-российжи уругларның шериг-патриотчу хөй-ниити шимчээшкининиң регионалдыг штавы-биле Р. Д. Кенденбиль аттыг республиканың уран чүүл школазы кады организастаан. АЗ саазынынга гуашь-биле чураан чуруктарны конкурсче хүлээп алыр. Конкурска 8-тен 16 харлыг уруглар киржир. Үш аңгы назы-харлыг бөлүк аайы-биле ажылдарны үнелээр. «Юнармия» бүгү-российжи уругларның шериг-патриотчу хөй-ниити шимчээшкининиң регионалдыг штавы февральдың 26-га чедир ажылдарны хүлээр.

Февраль 15-те, тус чернии-биле 11.00 шакта, Кызылда Тиилелге шөлүнге байырлыг митинг болуп эртер. Ада-чурттан дашкаар албан хүлээлгезин күүседип чораан дайынчыларга мөгейиг хүнүнге турскааткан концерт 14.00 шакта эгелээр. «Тыва» КТРК-ның ВКонтакте социал четкиде https://vk.com/grtktuva арынынга дорт дамчыдылгадан концертти көрүп болур.