Тыва, Калмыкия база Бурятия чөөн чүк чоннарыңыы-биле Чаа чылды «Россия» делгелге-шуулганынга уткаан

«Россия» делегейниң делгелге-шуулганының шөлүнге тыва Шагаа, бурят Сагаалган база калмык Цаган Сарны бир-ле дугаар каттыжып алгаш эрттирген. Регионнарның делегациялары национал идик-хевин кедип алгаш, хөй чылдарның быжыг найыралын көргүскен оюн-тоглааны бараалгаткан. Делгелгениң аалчылары Ак айны уткаан бурят, калмык база тыва чоннарның ужур-чаңчылдары-биле таныжар аргалыг болган. Байырлал каас-шиник, “амданныг” эрткен.

Тыва Республиканың Чазааның даргазының оралакчызы – Москва хоорайда Тыва Республиканың бүрүн эргелиг төлээзи Чечен Чоксум оюн-көргүзүгнү организастаарынга тыва команданың үлүг-хуузун үнелеп демдеглээн:

- Делегацияның шупту киржикчилери регионнар аразында бистиң быжыг харылзаавысты база чаңгыс культуравысты көргүскен байырлалдың кол ужур-чаңчылдарын бараалгадыр дээш долу күжү-биле ажылдаан – деп, вице-премьер чугаалаан.

Февральдың 11-де, Ак айда "Россия" делгелгеге байырлалдың чыскаалы, цирк көргүзүү, өңгүр-чараш ырылар, танцы-сам-биле чегелештир күчүлүг Улу моорлап келген.

Российжи кухня бажыңынга ыяш, ногаан Улу чылын уткаан «Сагаалган – Цаган Сар – Шагаа» сарыг шажын байырлалының кол кезээ национал аъш-чемнерни таныштырганы болган. Гастрономия фестивалында регионнар боттарының национал аъш-чемин бараалгаткан. Бурятия боттарының буузаларын амзадып, а республика Баштыңы Алексей Цыденов ону тударынга мастер-классты эрттирген. Калмыкия борцог биле хой эъттиг картошкалыг махан шёлтягян деп мүнүн таныштырган. Тыва Республика хоорган эътти бараалгаткан. «Хадыңчыгаш» кафениң чем кылыкчылары республиканың гастрономиктиг брендизи-биле делгелгени сонуургап келген чонну кайгаткан.

Тыва, Калмыкия база Бурятиядан коллективтер национал хөгжүм херекселдеринге үдевишаан боттарының ыры-шоорун бараалгадып, Ак айның баштайгы хүнүн дооскан. Калмыкияның «Ойраттар» күрүнениң танцы театры, Бурятияның «Байкал» күрүнениң национал ыры болгаш танцы театры, Бурятияның күрүне цирги, Тываның «Саяннар» национал хөгжүм болгаш танцы театры биле «Аян» бөлүү чогаадыкчы ажылын көргүскен.