Тыва суг үерлээшкининге удур белеткел ажылдарын эгелээр

Тываның Баштыңы Владислав Ховалыг аппарат хуралында часкы үерлээшкинке удур белеткел ажылдарын эгелээр сорулганы салган.
 
Тываның гидрометереология төвүнүң дыңнадыы-биле алырга, ооң мурнунда чылдарда деңнээрге, Мөңгүн-Тайганың дагларында, Чөөн-Хемчик, Чеди-Хөл база Тожу кожууннарда харның кылыны 130-330 хуу хөй болуп турар, ынчангаш камгалал хемчеглерни амдыгааштан эгелээр.

- Бо кыш харлыг болганындан, чамдык чурттакчылыг черлер сугга алзып болурунуң айыылы бар – деп, республика баштыңы чугаалаан.

Часкы суг үерин айыыл чок эртери-биле республика девискээринде 38 камгалал чалдарны шинчилеп, быжыглаар. Бөгүнде Шуй суурнуң чанында Барлык хемниң база Алдан-Маадыр суурнуң чанында Хемчик хемниң эриинге чалдарга күрүне экспертизазын эрттирип турар.

Кызыл хоорайның барыын талазында 5 километр эрикти дургаар кылган камгалал дамба идегелдиин бадыткаан. Гидротехниктиг тудугну 2023 чылдың августта, хуусаадан эрте ажыглалче киирген. Камгалал эрик быжыглаашкыны чүгле чуртталга девискээрлерин эвес, а уруглар сады, ийи школа, фельдшер-акушер пунктузу дээн ышкаш, чугула социал объектилерни суг үеринден камгалаар. Улуг-Хемниң эриин дургаар кылган чал үш дугаар камгалал быжыглаашкын болуп турарын демдеглезе чогуур.

Суг курлавырларының федералдыг агентилелиниң деткимчези-биле республика девискээринде гидротехниктиг 16 тудугну эде чаартып, бүрүн септээн. Эрик кыдыы черлерде чурттап турар 80 муң ажыг чурттакчының айыыл чок чоруун хандырып, суг айыыл-халавындан бооп болур 1,5 млрд рубльдиң когаралын чайлаткан.

Ам республика чоокку чылдарда Баян-Кол хемге, Кызылда аң фермазының девискээринге, Элегес-Аксы суурнуң чоогунга Улуг-Хемниң эриинге камгалал чалдарны септеп база тударынга, ол ышкаш Ээрбек хемге гидротехниктиг тудугга федералдыг деткимчени алыр дээш ажылдап турар.