Кызылга, Шагаа хүнүнде, тускай шериг операциязының киржикчилери биле оларның өг-бүлелериниң аразынга телекөвүрүгнү организастап эрттирген

Кызылда 55-ки гвардейжи тускай мото-адыгжы (даг) бригадага тускай шериг операциязында киржип турар дайынчыларның хей-аъдын көдүрер дээш чаңгыс чер чурттуглары, төрээн кижилери-биле ээлчеглиг “телекөвүрүгнү” ай санаашкыны-биле Чаа чыл - Шагаада эрттирген. Ол телекөвүрүгнүң чылыг ужуражылгазынга Тываның Баштыңы Владислав Ховалыг, аңгы-аңгы шериг кезектеринде албан эрттирип турар республикадан оолдар киришкен.

Республиканың Баштыңы хемчегниң киржикчилеринге байырын чедирип тура, төрел-аймактың байырлалы болур Шагаада телекөвүрүг дамчыштыр чоок улузундан база чаңгыс чер чурттугларындан хей-аъттың сөстерин дыңнаар арга бөгүн тургустунганын демдеглээн:

- Хүндүлүг бистиң шериглеривис, хөй националдыг чуртувустуң болгаш бистиң республиканың хостуг келир үези дээш эр хүлээлгеңерни күүседип турар силер. Тываның чону шериг албанныгларны бедик сорук-биле деткип турар. Шагаа байырлалының бүдүүзүнде чылыг идик-хептерлиг база тыва аъш-чемниг чүъктү чыгжып, тускай шериг операциязының зоназынче чоруттувус. Чонувустуң бир деми бистиң ниити тиилелгевисти, Кол дээди командылакчының шупту сорулгаларын күүседиринге магадылалды берип турар. Боттарыңарны камнаңар! Быжыг кадыкшылдыг болуңар! Курай! Курай!» - деп, Тываның Баштыңы чагаан.

ТР-ниң Баштыңының тускай шериг операция айтырыгларының талазы-биле тускай төлээзи Тимур Куулар баштаан Тывадан делегация харылзааның өске талазынга үнүп келген. Шагаа таварыштыр үнүпкен гуманитарлыг чүък чогуур черинде четкенин тускай төлээ илеткээн. Ында доңурган эът аймаа, тыва чемнер, чагыг езугаар саткан техниктиг херекселдер, чылыг идик-хеп, чаштынар четкилер, доктар билбес үш машина бар.

Тываның Камбы-ламазы Гелек Нацык-Доржу чаңгыс чер чурттугларының хей-ады, сүлде-сүзүү бедик чоруурун күзээн. «Тыва» ансамбли биле артист Мөңгүн-оол Монгуш сыгыт-хөөмей, ыры-шоорун дайынчыларга бараалгаткан.

Кызылдың президентиниң кадет училищезиниң кадеди Яромир Анай-оол база 5 дугаар гимназияның армейжилери шериглерге байырын чедирип, «Эргим авай» деп ырыны күүсеткен.  

Телекөвүрүг экраны таварыштыр дайынчыларының дөргүл-төрели болгаш чоок кижилери оларның-биле амы-хууда чугаалашкан. Дайынчыларның авалары, ажы-төлү-биле кадайлары, чоок улузу Тиилелгелиг онча-менди аал-оранынче дүрген чанып келирин күзээн.