Тываның Чазааның бажыңынга Шагаа байырлалынга уткуштур күрүне шаңналдарын тывыскан

11.02.2024 Бөгүн, февраль 10-да, Тываның Чазааның бажыңынга Шагаа байырлалынга уткуштур күрүне шаңналдарын ТР-ниң Баштыңы Владислав Ховалыг тывыскан.

ТР-ниң Баштыңы Владислав Ховалыг:

– Эргим чаңгыс чер чурттугларым, бөгүн ай санаашкыны-биле Чаа чылдың бирги хүнүнде күрүне шаңналдарын тыпсыр-дыр бис. Бо үеде бодувустуң аал-оранывысты, сагыш-сеткиливисти база үзел-бодалывысты арыглаары чаңчыл апарган. Ынчангаш чоннуң ынак байырлалы Шагаа-биле сеткилимниң ханызындан байыр чедирип тур мен. Чаа чыл силерниң өг-бүлеңерге ынакшылды база эп-найыралды, чедиишкиннерни, аас-кежикти, менди-чаагай чорукту эккээр болзун! Шагаа чылдың түңнелин үндүрүп, чылыгны эккеп, бойдусту чаарттыр болуушкун. Чаа-чаа чедиишкиннер боду чедип келбес, а бистиң күжениишкинниг ажыл-иживистиң түңнели болур болбайн канчаар.

Ажы-төлүвүстүң келир үези дээш, хостуг чоруувус дээш, ТШО девискээринде төрээн чурттувустуң эрес-дидим оолдары бо хүннерде тулчуп турар. Оларның аразында бистиң чаңгыс чер чурттугларывыс база бар. Дайынчы хөделиишкиннерде чаңгыс чер чурттугларывыска деткимче көргүзер дээш, республиканың чурттакчы чону чаңгыс демин көргүзүп, бүгү күжүн мөөңнеп, Шагаа таварыштыр ээлчеглиг ачы-дуза чүъгүн аъткарыпкан.

РФ-тиң Президентизи В.Путинниң чарлааны солун болгаш харыысалгалыг өг-бүле чылы бисти манап турар. Россияның Президентизиниң болгаш Парламентиниң составын чаартыр харыысалгалыг соңгулдалар бо чылын болур. Тываның ССРЭ-ниң составынче киргенден бээр 80 чыл болган оюн бо чылын демдеглээр бис.

Республиканың болгаш чурттуң хөгжүлдезинге, сайзыралынга киирген үлүг-хууңар дээш сеткилимниң ханызындан четтиргеним илередип тур мен. Байырлал-биле!

Байыр чедирген соонда, күрүне шаңналдарын шылгарааннарга тывыскан.

Кадык камгалалынга хөй чылдарда үре-түңнелдиг ажылы дээш, Республиканың 1 дугаар эмнелгезиниң анестезиология болгаш реанимация салбырының даргазы Буян Моңгушту, Чөөн-Хемчик кожууннуң эмнелге төвүнүң эмчизи Артыш Сатты РФ-тиң Президентизиниң өөрүп четтириишкининиң бижии-биле шаңнаан.

ТР-ниң Медицина төвүнүң медээлер анализтээр төвүнүң килдис эргелекчизи Эренмаа Ондарны кадык камгалалынга хөй чылдара үре-түңнелдиг күш-ажылы дээш, РФ-тиң Президентизиниң хүндүлел бижии-биле шаңнаан.

Кызылдың 15 дугаар лицейиниң башкызы Зинаида Дехтярга өөредилге адырынга хөй чылдарда үре-түңнелдиг күш-ажылы дээш, «РФ-тиң алдарлыг башкызы» деп хүндүлүг атты тывыскан.

Хөй чылдарда үре-түңнелдиг ажылы дээш, полицияның майору Станислав Таржааны, Эрзин кожууннуң Бай-Хөл көдээ ажыл-агый кооперативиниң кадарчызы Артыш Баажайны, Кызыл кожууннуң Белдирде хууда ажыл-агый даргазы Валентина Ондар оларны ТР-ниң Баштыңының Өөрүп четтириишкинниң бижии-биле шаңнаан.

Хөй чылдарда үре-түңнелдиг, бердинген ажылы дээш, РФ-тиң национал гвардияның Тыва Республика талазы-биле инспектору полицияның майору Дмитрий Бадринге, өөредилге адырынга шылгараңгай ажылы дээш, дыңнаары багай уругларның школа-интернадының география башкызы Лидия Гавриленкога, Кызылдың 12 дугаар школазының башкызы Светлана Яковлевага, улусчу чурулганың хөгжүлдезинге киирген үлүг-хуузу дээш, ТР-ниң чурукчулар эвилелиниң даргазы Аяс Кагай-оолга, Тываның В.Көк-оол аттыг национал хөгжүм-шии театрының бызаңчызы Айдомир Шалыкка, хөй чылдарда ак сеткилдиг ажылы дээш, «Тардан Голд» ААН-ниң диспетчери Елена Горбунова оларга ТР-ниң Баштыңының хүндүлел бижиктерин тывыскан.

Аныяк-өскенниң кижизидилгезинге үлүг-хуузу, үлегери дээш база хөй-ниити ажылынга идепкейлиг чоруу дээш, «ТР-ниң алдарлыг ажылдакчызы» деп хүндүлүг атты Тамара Наводкинага тывыскан.

«Шак-ла мындыг улуг шаңналдар тыпсыр байырлалда бир дугаар киржип тур мен. Моон-даа соңгаар шаңналдарга киржир боор мен дээрзинге идегеп тур мен. Дүүн мугур 80 харлап алдым. Төрүттүнген хүнүмде шак мындыг улуг белек дээш, четтиргенимни илереттим. 50 чыл дургузунда бараан болган ажылым мындыг үре-түңнелдиг болур дээрзин бодавайн-даа чордум. Мээң ажылымны үнелээниңер дээш четтирдим. Афганчыларның эвилелиниң тургустунганындан бээр бо чылын 35 чыл ою болур. Байырлыг хемчегни эрттиреринге белеткениринге республика чергелиг белеткел ажылдарын чорудуп эгелээни дээш, Тываның Чазаанга болгаш Дээди Хуралга хоочуннарның өмүнээзинден четтиргенимни илередип тур мен.

«Аныяк назын кижи бүрүзүнге келир, а кырыыр назын чүгле шилиттингеннерге келир» деп чоннуң үлегер домаа бар. Ынчангаш улуг назылыгларны үнелеп, хүндүлеп чорууруңарны күзедим! Ногаан Улу чылында чедиишкиннерни, кадыкшылды, ынакшылды күзедим!» – деп, Тамара Наводкина чугаалады.

Хөй чылдарда кадык камгалалынга үре-түңнелдиг ажылы дээш, «ТР-ниң кадык камгалалының алдарлыг ажылдакчызы» деп хүндүлүг атты республиканың 1 дугаар эмнелгезиниң медицина сестразы Валентина Доңгакка тывыскан.

Кадык камгалал адырынга хөй чылдарда бедик мергежилдиг, ак сеткилдиг ажылы дээш, «ТР-ниң алдарлыг эмчизи» деп бедик атты республиканың психиктиг аарыглар эмнелгезиниң херээженнер салбырының даргазы Раиса Чамбал-оолга берген.

Кадык камгалалының хөгжүлдезинге киирген үлүг-хуузу дээш, «ТР-ниң Улустуң эмчизи» деп атты республиканың 1 дугаар эмнелгезиниң анестезиолог эмчизи Самба Доога тывыскан.

Республиканың культуразының, уран чүүлүнүң сайзыралынга киирген үлүг-хуузу дээш, «Шылгараңгай күш-ажылы дээш» деп республика медалы-биле культураның хоочуну Светлана Сатты шаңнаан.