РФ-тиң камгалал сайыды Сергей Шойгу Тываның чурттакчыларынга чырыткылыг Шагаа байырлалы-биле байырын чедирген

Россияның камгалал сайыды, Армияның генералы Сергей Шойгу Тыва Республиканың Баштыңы Владислав Ховалыг адынче чырыткылыг Шагаа-биле регионнуң удуртукчузунга база республика чонунга байыр чедирген чазак телеграммазында бүгүдеге чүгле эки күзээшкиннерни дамчыткан.

Тываның Баштыңы социал четкилерде телеграмманы тырттыргаш салган.

«Чырыткылыг байырлал-биле Силерге болгаш Тыва Республиканың чонунга байырым чедирдим. Кадыкшылды, аас-кежикти болгаш бүгү-ле күзелдериңер боттанырын сеткилим ханызындан күзеп тур мен. Чаа үнген чыл хөй-хөй аас-кежиктиг хүннерни болгаш болуушкуннарны эккеп, чагай күзээшкиннериңерни боттандырзын» - деп, телеграммада бижээн.