Тываның Баштыңы Российжи эртем хүнү-биле республиканың эртем ниитилелинге байырын чедирген

Тываның Баштыңы Владислав Ховалыг бодунуң социал четкилеринде Российжи эртем хүнү-биле байырын чедирген. Республика Баштыңы регионнуң хөгжүлдезинге, амыдыралдың аңгы-аңгы адырларында турум байдалды хандырарынга эртемденнерниң үлүг-хуузун демдеглээн. Тываның эртемденнери республикада бо чылын демдеглээр юбилейлиг хемчеглерни организастап база демдеглээринге үлүүн киирер боор деп, бүзүрелин илереткен. Республикада чеди организация эртем ажылын чорудуп турар.

Республикада эртем болгаш эртем-өөредилге организациялары эртем талазы-биле боттары онзатөөгүлүг дээрзин Владислав Ховалыг демдеглээн.

- Эртемденнер республиканың технологтуг сайзыралынга, амыдыралывыстың гуманитарлыг адырын хөгжүдеринге, экономиктиг болгаш социал турум чорукту хандырарынга, кижилерниң кадыкшылын, бойдусту, Тывада чурттап турар чоннарның төөгүлүг база культурлуг өнчү-салгалын камгалаарынга улуг үлүг-хуузун киирип турар – деп, Баштың бижээн.

Бо чылын Тыва ССРЭ-ниң составынче эки тура-биле каттыжып киргениниң 80 чылын демдеглеп эрттирерин республиканың удуртукчузу сагындырган. Юбилейлиг хемчеглер планында республиканың бурунгаар хөгжүлдезинге тураскааткан эртем-практиктиг конференцияны эрттирери көрдүнген.

Тываның эртемденнери конфреренцияны белеткеп эрттиреринге идепкейлиг киржип, «республиканың бот-тускайлаңынга хамаарыштыр боттарның кайгамчык шинчилелдеринге база ханы билиглеринге даянгаш, онза чугула айтырыгларны база санал-оналдарны хевирлеп тургузар боор...» деп Владислав Ховалыг демдеглээн.

Республиканың Баштыңы эртемденнерге, башкыларга, эртем ажылдакчыларынга база аспирантыларга тускайлаң чаа ажыдыышкыннарны, тургузукчу күш-ажылынга чедиишкиннерни күзээн.