Тываның Баштыңы Вавилин ээтпээнде чаа школаны хынаан

Бо чылын өөредилге чорудуун эгелээр объектилерниң бирээзинге Кызыл хоорайда Вавилин ээтпээнде школа хамааржыр.

Чурттуң Президентизи Владимир Путинниң инициативазы-биле “Өөредилге” национал төлевилелди боттандырып, республикага 10 чаа школа ажыттынар, а “Көдээ девискээрлерниң комплектиг хөгжүлдези” федералдыг программа-биле Чодураа суурда бир школа туттунуп турар.

- Класстарга эт-септи удавас эптеп, тургузар. Арыглаашкын дериглерин ажылдадыр. Ооң-биле чергелиштир чаа школаның башкы штадын тургузуп турар. Ам безин бежен башкы чаа школага ажылдаар күзелин илереткен – деп, хыналда соонда Владислав Ховалыг бижээн.

Кызылдың Бай-Хаакская кудумчузунда «ПрофЛидер» 19 дугаар школа база Тываның Улустуң башкызы Петр Александрович Морозовтуң адын эдилээн Сукпакта 825 олуттуг школа бо чоокку үеде ажыттынар.

19 дугаар школада чогуур эт-септи база дериг-херекселдерни эптеп салып, өрээлдерни арыглап аштап турарын Тываның Өөредилге яамызы дыңнаткан. Харыысалгалыг эртем башкыларынга кабинеттерни хувааган. Школа библиотеказы 42 муң санныг өөредилге номнарын хүлээп алган.

Сукпакта ажыттынар школага Тыва Республиканың Аграрлыг лицейи ниити өөредилге программазы база тускай угланыышкынныг программа-биле ажылдаар. Кадыкшыл байдалы кызыгаарлыг уругларга бүгү талалыг өөредилгени бээри көрдүнген.