Республика чурттакчызының мөчээн чылдагаанын истээр дилегни Тываның омбудсмени Россияның Истелге комитединиң даргазынче киирген

Тываның Баштыңы Владислав Ховалыгның даалгазы-биле, 2024 чылдың январь 31-де Санкт-Петербург хоорайның Мария эмнелгезиниң дузалал ажыл-агый өрээлинге республиканың чурттакчызы Айдыс Чындыгырның мөчүзү тывылган фактыга истелгени чорудар дугайында бижикти Россия Федерациязының Истелге комитединиң даргазы Александр Бастрыкинниң адынче чоруткан. Санкт-Петербург хоорайда кижиниң эрге-ажыын камгалаар бүрүн эргелиг төлээ Светлана Агапитованың адрезинче мөчээн кижиниң кажан, каяа, кандыг байдалдарда чок болганын тодарадыр дилегни киирген.
Республика Баштыңының даалгазы-биле Тыва Республикада кижиниң эргелериниң талазы-биле бүрүн эргелиг төлээ Александр Адыгбай Айдыс Чындыгырның чок болганын тодарадырын бодунуң контролюнда ап, бижикти чоруткан. Социал четкилерде тарай берген онза бодуушкун дугайында медээ республикада дүвүрээзинни болдурган. Чок болган кижи салым-чаяанныг бичии шыдыраачы, классиктиг шахматка Россияның чыынды командазының кежигүнү, республиканың төөгүзүнде бир дугаар ФИДЕ мастери, 2023 чылда классиктиг шахматка Россия чемпиону Тамерлан Чындыгырның ачазы болуп турар. Санкт-Петербургтуң суворовчу шериг училищезинге оглун өөредир дээш өг-бүле чурттуң соңгу төвүнге көжүп келген.
2023 чылдың декабрь 16-да Санкт-Петербург хоорайның Мариинск эмнелгезинге чыттырган соонда чиде берген оглун боду дилеп тыпкаш, ооң чок болганының дугайында ие кижи дыңнаткан. Оглунуң чиде бергениниң дугайында билдириишкинни Россияның ИХЯ Санкт-Петербург хоорайның Центральный район талазы-биле эргелелиниң 78 дугаар полиция килдизинче киирип турган.