Тывада коклюш аарыының көвүдээни демдеглеттинген

2023 чылга деңнээрге, Тывада коклюштан аарыыры январьда 2 катап көвүдээн. 2024 чылдың эгезинде 100 муң чурттакчы чонга онааштыр 5,3 кижи (РФ-те – 11,5), азы 18 кижи коклюштан аарааны бүрүткеттинген.

Эрткен чылын аараан 37 кижини шуптузу 15 харга чедир бичии уруглар деп, Росхереглел хайгараалының регионалдыг эргелели дыңнаткан. Аараан уругларның 70 хире хуузу 1 харга чедир чаштар болган. Халдавырдан тарылгалыг 4 уруг база аарааны демдеглеттинген.

Ол таварылгаларга хамаарыштыр истелге эгелээн. Амдыызында халдавыр тарадыкчызының дөрт дөзү билдинген. Өске регионнардан: кожа Хакасиядан – бир, Владивостоктан база келген уруглар аарыг болган. Ол аарыг уругларның ада-иелери аарыгны Кызылда республиканың уруглар эмнелгезинден чыпшырып алган деп санап турарлар.

Халдавырның дүрген тарап нептереп турары эмчилерни кичээндирген. Тываның девискээринде коклюштан аараан 8 чаа таварылга февраль эгезинде бүрүткеттинген. Кызылда 11, Кызыл, Улуг-Хем, Чаа-Хөл, Таңды, Барыын-Хемчик, Эрзин база Чеди-Хөл кожууннарда 1-1 кижи аараан.

Тываның Баштыңы Владислав Ховалыг уругларны коклюшка база онза айыылдыг өске-даа аарыгларга удур үезинде тарыыр ажылга контрольга алыр даалганы ТР-ниң Кадык камгалал яамызынга хүлээндирген. Коллективтиг иммунитетти хевирлээр дизе, бичии уругларның 95 хуузу тарыткан турар ужурлуг. Айыттынган аарыгларга удур профилактиг тарылгага вакцинаны четчир кылдыр курлавырлаар.

Коклюшту чүгле лабораторлуг шинчилел-биле тодарадыр. Ук аарыгдан аараан кижи дыка чырык, дыңзыг дааштыг азы сүрээденчиг байдалдарда чөдүре бээр, чүге дизе аарыг төп нерв системазының тыныышкан төвүнге дээр. Чөдүртүрү берге болганындан бичии уругларга онза айыылдыг болгаш өлүмнүг бооп болур. Чаш уругнуң чүрээ туруптуп болур. Улуг кижи өкпезинге дегдирип, күштүг чөдүлден ээгилер сыйлы берги дег апаар.