Тываның Баштыңы Владислав Ховалыг Россияның вице-премьери - үлетпүр болгаш садыг сайыды Денис Мантуров-биле ужурашкан

Россия Федерациязының Чазааның даргазының оралакчызы – үлетпүр болгаш садыг сайыды Денис Мантуров-биле Тываның Баштыңы Владислав Ховалыг ажыл-агыйжы байдалда ужурашкаш, республиканың үлетпүр болгаш социал адырларында инвестиция төлевилелдериниң энергетика хандырылгазының комплекстиг планының күүселдезин чугаалажып көрген. Бөгүнде регионнуң девискээринде чырык четкизиниң ниитизи-биле 540 МВт күчүлүг ажыл-агый объектилерин тудуп база эде чаартып турар.

2021 чылдың декабрьда бадылаан комплекстиг планның сорулгазы – Тыва Республикаже киирер чырыктың күжүн 2,5 катап улгаттырып, 400 МВт чедирер. Ол даг тывыш болгаш болбаазырадылга үлетпүрүнде улуг инвестиция төлевилелдерин энергетика курлавырлары-биле хандырар.
Инвестор бодунуң талазындан социал хүлээлгелерин күүседип, кожа-хелбээ чурттакчылыг черлерни чырык-биле хандырар. Чырык күчүзүн улгаттырары - республикага чуртталга тудуун хөгжүдеринге идигни бээр.

Амгы үеде «Россети» компания комплекстиг план күүселдези-биле, республика девискээринге 312 км-ге шөйлү бээр 220 кВ күштүг «Туран – Туманная» чырык шугумун тудуп турар. Компания ооң-биле чергелештир, 2023 чылдың төнчүзүнде чаа магистраль транзидин кожарынга 220 кВ-тыг «Туран» подстанцияның эде чаартылгазынче кирген. Ол ажылдар доосту бээрге, Ак-Суг металл руда чыдыны дүрген шиңгээттинип, Кызыл агломерациязы хөгжүп, Тожу кожууну чырык-биле хандыртынар.

Тываның Баштыңы Владислав Ховалыг ужуражылга соонда, Россия Федерациязының Чазааның база Россияның үлетпүр база садыг яамызының талазындан деткимчези дээш, вице-премьер – Россияның үлетпүр болгаш садыг сайыды Денис Мантуровка четтиргенин илереткен.