Тывада Кызыл хоорайның турисчи кодун чогаадып турар

«Сибирь дыштанылгалары» дээн ышкаш турисчи маршрут кирген национал турисчи угланыышкыннарны бөгүн бүгү чурт сайзырадып турар. Чурттуң Президентизи Владимир Путинниң Красноярск крайның, Хакасияның база Тываның девискээрлеринге чораан дыштанылга кокпалары-биле ол харылзаалыг.

Владислав Ховалыг Дээди Хуралга 2024 чылда Айыткалында, төлевилел боттандырылгазы-биле туристерниң аянныг болгаш тамчыктыг дыштанырынга бүгү-ле байдалдарны республика тургузар ужурлуг деп айыткан.

Тываның туризм талазы-биле агентилели биле Кызыл хоорай мэриязының мурнунга, регионнуң найысылалынга тайылбырлыг айтыкчылары, карта-схемаларны, информастыг адагаштарны тургузуп, фотозоналарны чаагайжылар даалганы республиканың баштыңы берген.

«Сибирь дыштанылгалары» маршрут-биле туристер Тывада «Цеченлинг» сарыг шажын хүрээзин, Шакьямуни бурганның тураскаалын, «Азия төвү» скульптура комплекизинге чедип, тываларның көшкүн амыдыралы-биле таныжып, тыва идик-хептиг тырттырып алыры-биле малчын аалдарга барып турар.

Тываның туризм агентилели Калмык база Бурят республикалардан коллегалары-биле дугуружулга езугаар чурттуң буддийжи төптерин база ыдыктыг черлерин эргип көөр чаңгыс аай турисчи маршрутту ажылдап кылып турар. Транспорттуң чедингирин база нептереңгейин көрүп, турисчи операторлар-биле маршруттуң точкаларын сайгарып көрген.

Күжүгет Шойгу аттыг культура фондузунуң эгелээшкини-биле туткан чуртта эң улуг «Тубтен Шедруб Линг» сарыг шажын хүрээзиниң ажыдыышкыны, чаңгыс улуг турисчи маршрутту тургузар бодалга идигни берген. Ол хүрээ республиканың билдингир турисчи черлериниң бирээзи апарган.