ТШО зоназында тыва шериглерже ээлчеглиг гуманитарлыг чүъктү чоруткан

Шериг албанныгларга дуза чедирер чаңгыс аай штаб тускай шериг зоназынче доң инек, хой база аът эъттери-биле долдурган 20 биле 5 тоннаның ийи чүък машиназын чоруткан.

Республиканың шупту кожууннарындан база чедери берге ыраккы Тере-Хөлден малчыннар алды тонна коң эъттерни чыгган. ТР-ниң Дээди Хуралының депутаттары биле Тываның Садыг-үлетпүр палатазының кежигүннери транспорт аймаан үндүрүп берген.

Оон аңгыда дайынчыларның дилээ езугаар техниктиг дериг-херекселдерни, тыва чемнерни, чылыг идик-хепти, электрилиг дериг-херекселдерни, демир суугуларны, чаштынар четкилер болгаш өске-даа херектиг чүүлдерни чоруткан.

Өөредилге ажылдакчыларының профэвилелиниң, Федералдыг казначейство эргелелиниң база Национал хөгжүм-шии театрының ажыл-ишчи коллективтериниң буянныг киржилгези-биле дроннарны, дүне көөр херекселдерни, рацияларны, ужудукчу чок ужар аппарат дүжүр адар чүүлдерниң ээлчеглиг партиязын дайынчыларже чоруткан.

Луганск база Донецк Улус Республикаларда, Запорожьеде шериг кезектери чүъктү алыр. ТШО зоназынче чүъктү чедире бээрге, тыва лама башкы дайынчы оолдарга шажынчы езулалды кылып, ном номчуур.

- «Улусчу фронт. Шупту чүвени тиилелгеже!» деп регионалдыг чыылдага үлүүн киирип каттышкан Тываның хөй-ниити каттыжыышкыннарының активчилеринге, күрүне органнарының, бюджет организацияларының төлээлеринге, бүгү сайгарлыкчыларга, шупту чаңгыс чер чурттугларывыска четтиргенивисти илереттивис. Силерниң деткимчеңер эвес болза, Төрээн чуртунуң эрге-ажыын камгалаар дээш бодунуң хүлээлгезин күүседип турар дайынчыларывыска дузаны чыыры берге турган – деп, Улусчу фронтунуң регионалдыг күүсекчи комитединиң удуртукчузу, шериг албанныгларга деткимче көргүзер чаңгыс аай штабтың удуртукчузунуң оралакчызы Саима Далчин чугаалаан.

Гуманитарлыг чүък ай санаашкыны-биле Чаа чыл – Шагаа бүдүүзүнде шериг оолдарга чеде бээр.