Тываның экономика адырының хоочуну, Россия Федерациязының алдарлыг экономизи Светлана Николаевна Сапова мөчээн

Тываның Баштыңы болгаш республика Чазааның кежигүннери күрүне албанының хоочуну, Россия Федерациязының алдарлыг экономизи Светлана Николаевна Сапованың мөчээни-биле ооң төрээн болгаш чоок улузунга ханы кажыыдалын илереткен.

Светлана Николаевна республиканың экономика адырынга үжен ажыг чылдарда ажылдаан, ооң алды чылында Тыва Республиканың экономика яамызын удурткан.

Светлана Николаевна Сапова 1940 чылдың ноябрь 6-да Иркутск облазының Усть-Уда районунуң Федоровка суурга төрүттүнген. Иркутскиниң улус ажыл-агый институдун 1963 чылда «Тудуг экономиказы болгаш организациязы» мергежилдиг дооскан.

Светлана Николаевна Тывада «Тувинстрой» трестке бирги ажылчы базымын инженер-экономист албан-дужаал-биле эгелээн, дараазында экономиктиг лаборатория начальнигинге томуйлаткан. Сапова трестке ажылдап турда, «Туваасбест» комбинат тудуунуң ийиги чадазы чоруп турган.

1971-1975 чылдарда Кызылдың политехникумунга башкылаан, 1975 чылдан «Тувинводстрой» трестиң демир-бетон кылыглар заводунга ажылдап турган.
Хоорай Совединиң депутады, хоорай күүсекчи комитединиң даргазының оралакчызы чораан.

1990 чылда Светлана Николаевнаны Күрүнениң экономика комитединге ажылдаарынче чалаан, 1991–1992 чылдарда рынок реформазы-биле ажылдаар тускай комиссияга ажылдаан.

Тыва Республиканың бирги Президентизи Ш.Д. Ооржак Сапованы 1998 чылдың ноябрьда экономика сайыдынга томуйлаан.
Экономика сайыдынга ажылдап чорааш, Сапова республиканың социал-экономиктиг хөгжүлдезиниң үр хуусаалыг прогнозун, Тыва Республиканың социал-экономиктиг хөгжүлдезиниң стратегиязын ажылдап кылырын баштаан.

С.Н. Сапованың удуртулгазы база ТР-ниң Экономика яамызының деткимчези-биле. ТР-ниң Национал музейи, амгы “Кызыл” аэропорту азы аэровокзал, халдавырлыг аарыглар эмнелгези, терапия база перинаталдыг төп дээн ышкаш, чугула объектилерни туткан. Тубдиспансерни немей туткан. Доозулбайн турган чуртталга бажыңнарын, Кызылда 8 дугаар школаны, 5 база 9 дугаар школаларга, күрүне лицейинге немелде тудугларны, күрүне университединиң объектилерин, республиканың кожууннарында школаларны туткан.

2004 чылдан 2007 чылга чедир Тыва Республиканың Чазааның Даргазының чөвүлекчизи турган.

Светлана Николаевна Сапованы республиканың экономика адырын хөгжүдеринге үлүг-хуузу дээш Россия Федерациязының Экономиктиг хөгжүлде болгаш садыг яамызының Хүндүлел бижии-биле шаңнаан. Ол «Тыва Республиканың алдарлыг экономизи», «Тыва Республиканың алдарлыг ажылдакчызы», «Россия Федерациязының алдарлыг экономизи» хүндүлүг аттарның эдилекчизи. «Кызыл хоорайның хөгжүлдезинге ачы-хавыяазы» медаль, «Россия биле Тываның демнежилгениң 100 чылы база Кызыл хоорайның тургустунганының 100 чылы» юбилейлиг медаль-биле шаңнаткан.