2023 чылда Кызылдың аэропортундан пассажирлер аргыштырылгазы 17,8 хуу өскен

2023 чылда Тываның кол аэропорту 110,9 муң пассажирлерни аргыштырган. 2022 чылга деңнээрге 17,8 хуу хөй, азы ынчан 91277 кижи ушкан. Эрткен чылда агаар транспорту-биле пассажирлер аргыштырылгазының баш бурунгаар түңнелдерин Тываның Орук-транспорт комплекизиниң яамызынга чугаалашкан.

Республиканың агаар шугуму-биле пассажирлер аргыштырылгазы пандемиялыг 2020 чылга деңнээрге, 2,2 катап өскен. Авиатранспорттуң пассажирлер аргыштырылгазынга субсидия бээр федералдыг программа күүселдези-биле, регионнар аразынга рейстерни ажытканындан, ол көргүзүг өскенин специалистер дыңнаткан.

Амгы маршруттарга немей чаа угланыышкыннарже рейстерни көвүдеткенинден пассажирлер авиаргыштырылгазы көвүдээн деп, Орук-транспорт яамызы тайылбырлаан. Эрткен чайын Москва – Кызыл – Москва угланыышкынныг ужудуушкунну чайгы үеде неделяда 5, а кыжын – 3 чедир көвүдеткен. Кызыл – Новосибирск, Кызыл – Красноярск рейстериниң санын база ынчаар кылган. Кызылдың аэропортунуң расписаниезинде Улан-Удэже неделяда ийи катап ужар рейс база немешкен.

2024 чылда республика Красноярск, Новосибирск, Улан-Удэ база Москва хоорайларже регионнар аразының субсиядиялыг дөрт рейзин камгалап алган. Ынчап кээрге, пассажирлер аргыжылгазы ам-даа көвүдээр ужурлуг. Он аңгыда Тываның Баштыңы Владислав Ховалыг регион чазааның мурнунга Кызылдан даштыкыже рейстерни ажыдар даалганы тургускан. Тыва биле Моолдуң найысылалы Улан-Баторже дорт ужудуушкунну эгелээри планнаттынган.