«Арыг агаар» төлевилелди боттандырар кады ажылдажылга дугуржулгазынга Россияның Бойдус яамызы биле Тываның Чазаа аттарны салган

Январьның 26-да, Экология хүнүнде, ВДНХ-га «Россия» делегей делгелгезиниң үезинде, Россияның Бойдус яамызы биле Тываның Чазааның Кызыл хоорай округунга «Арыг агаар» федералдыг төлевилел боттаныышкыны-биле кады ажылдаарының дугайында дугуржулгага атты салган. РФ-тиң бойдус курлавырлары болгаш экология сайыдының бирги оралакчызы Константин Цыганов база ТР-ниң бойдус сайыдының бирги оралакчызы – экология болгаш бойдус ажыглалының департамент начальниги Григорий Ондар олар документиге атты салганнар.

2020 чылдың көргүзүглеринге деңнээрге, 2030 чылда агаарның хирлениишкинин ийи катап эвэжедири – "Арыг агаар" төлевилелдиң кол сорулгазы. Эрге-чагырганың мурнунда бирги айтырыг – хуу бажыңнарның база үлетпүр котельнаяларының суугуларын чылыг хандырылгазының экологтуг дөстеринче шилчидери. 2023 чылдың сентябрь 1-ден эгелеп Кызыл хоорай ук төлевилелче каттыжып кирген.

Төлевилелдиң негелделерин күүседир дээш, 2023 чылда Кызылдың ЧЭТ-иниң чылыг четкизинге 6 объектини кошкан: "Тываавтодор", "Тардан голд", "Техсервис" база административтиг оран-савалар. А 2024 чылда төпчүткен чылыг хандырылгазынга ам-даа 6 объектини кожар: «Арбын» садыг бажыңы, 10 дугаар школа, карак эмнелгези, өрт-камгалал кезээ, Президентиниң кадет училищези база Субедей" спорткомплекизи.

Дараазында чылдарда Кызылда 15, Каа-Хем суурда 2 объектини техниктиг база инвестиция аргаларын база чылыг четкизинге чоогун көрүп тургаш, кожары планнаттынган.

Тываның арга-арыг ажыл-агый база бойдус ажыглалының сайыдының оралакчызы Григорий Ондарның чугаазы-биле алырга, дугуржулгага ат салыышкыны шупту деңнелде эрге-чагырга органнарының база үлетпүр компаниялары, бүдүрүкчү бүдүрүлгелерниң аразында кады ажылдажылганы элээн экижидер.

Долгандыр хүрээлелге хамаатыларның харыысалгалыг хамаарылгазын хевирлээринче ВДНХ-да эртип турар культура-өөредиглиг программаны угландырган. Регионалдыг арга-арыг болгаш бойдус ажыглалының яамызы Москва хоорайда Тываның бүрүн эргелиг төлээ чери-биле кады, ВДНХ-ның чурагайлыг стендилеринге, «Экология» национал төлевилелди республика девискээринге 5 чылда боттандырганының түңнелдерин көргүскен.