Тываның Баштыңы федералдыг юстиция яамызының удуртулгазы-биле Кызылдың төп кезээнде хоругдал албан черин өскээр көжүрер талазы-биле айтырыгны чугаалашкан

Владислав Ховалыг Россияның юстиция сайыды Константин Чуйченко-биле ужуражылга үезинде, 1 дугаар эдип-чазаар колония биле истелге үезинде тудуп-хоругдаар черни өскээр көжүрери эргежок чугула апарганын демдеглээн. 

Тываның чурттакчы чонунуң чартык кезии чурттап турар республика найысылалының стратегтиг хөгжүлде планы-биле ону кылыры чугула апарганын регионнуң удуртукчузу дыңнаткан. Чоокку үеде сайзырап-хөгжүдери көрдүнген чуртталга тудуглары-биле хоругдал черлери шуут-ла кожа турар апаар.

Бөгүннүң планындан алгаш көөрге, 1 дугаар эдип-чазаар колония биле истелге үезинде тудуп-хоругдаар черни кеземче күүселдезиниң федералдыг албанының 1800 олуттуг чаа объектизинче өскээр көжүрүп болур. Ооң дөзевилелин 2028 чылда эгелээр, а тудугну 2030 чылда тудары планнаттынган. Тываның Чазаа ол ажылдарга чер участогун Кызыл кожуунда аңгылаан.

«Константин Анатольевич Чуйченкога хуусааларны эде көөрүн саналдадым. Төлевилел ажылдарын 2025 чылда кылгаш, а тудугну 2027 чылда эгелээр деп. Ол таладан билиишкин бар болду» - деп, Тываның Баштыңы федералдыг Юстиция яамызынга ужуражылга соонда, социал четкилерге бижээн.

Владислав Ховалыг бодунуң бижиинде, Тывага Күрүнениң юридиктиг бюрозун ажыдарынга деткимчени көргүскени дээш Константин Чуйченкога четтиргенин илереткен. Президентиниң даалгазы-биле 49 регионда, ооң иштинде Тывада база, ындыг албан чери ажыттынган. Тывада Күрюрбюро эрткен чылдың майдан ажылдап турар. 3,5 муң ажыг кижи аңаа халас юридиктиг дузаны алган.

Ужуражылга үезинде Тывада Хамааты байдал актыларының бижидилге органнарының база федералдыг суд приставтар албанының ажылы-биле холбаалыг элээн каш айтырыгларны чугаалашкан. Россияның юстиция сайыды ол айтырыгларны таптыг өөренип көөрү-биле, бо чоокку үеде Тывага келир.