Республиканың Баштыңы башкы мергежилинде өөренип турар студентилерни стипендиялар-биле деткиир

Тываның Өөредилге яамызы республика Баштыңының даалгазы-биле эрткен чылын эгелээн «Мээн башкым» губернатор төлевилелиниң 2022-2023 өөредилге чылында түңнелдерин үндүрүп, дээди болгаш ортумак тускай өөредилге черлеринде башкы мергежилдериниң студентилеринге конкурстуң түңнелин үндүрүп, стипендияларны тывыскан.

Аныяктар ортузунга башкылаашкын ажылының алдар-адын бедидер дээш, Владислав Ховалыгның инициативазы-биле башкы ажылдакчыларын деткээн хемчеглерниң бирээзинге студентилерге стипендияларны тыпсыры болур.

Конкурс шилилдезиниң түңнели-биле, дээди өөредилге черлериниң 10 студентизинге, ортумак өөредилге черлериниң 7 сургуулунга «губернатор» стипендияларын тывыскан. Стипендияларның хемчээли – дээди өөредилге черлериниң студентилеринге 5000 рубль, а ортумак өөредилге черлериниң сургуулдарынга 3000 рубль болур. Эвээш дизе 150 муң рубль түңнүг чаңгыс катап алыр деткимчелиг “Мен – башкы мен” төлевилел келир үениң башкыларын сонуургалын болдурган.

А. И. Герцен аттыг Россияның күрүнениң педагогика университеди, Н.Ф. Катанов аттыг Хакасияның күрүне университеди, В.П. Астафьев аттыг Красноярскиниң күрүнениң педагогика университеди, В. К. Штильке аттыг Барнаулдуң күрүнениң педагогика колледжизи, Тываның күрүне университеди база Кызылдың башкы колледжизи конкурска киришкен.

Башкылаашкын угланыышкынында мөөрейлерниң болгаш шуулганнарның киржикчилери болгаш тиилекчилери, эртем ажылында база ачы-буян ажыл-чорудулгазында идепкейжи хамааты туружу база хөй-ниитичи ажылы-биле шылгараан, келир үениң 36 башкызының ажылдарын сайгарып көрген.

Хакасияның күрүне университединиң студентизи Чаян Хертек – стипендия алыкчыларның бирээзи. Келир үениң биология башкызы эрткен чылын “Россия – арга-шыдалдарның чурту” президент шөлүнүң “Сээң шилилгең” төлевилелге чедиишкинниг киришкеш, аңаа тиилээн. Чаян өөредилге соонда чанып келгеш, школага мергежили-биле ажылдаар планныг.